Dzitmar Chop. Fota: Vikipiedyja
Zasnavalnik kampanii SAP i ŭłaśnik bijatechnałahičnaj firmy Curevac Dzitmar Chopp spyniŭ sprobu Vašynhtona zajmieć ekskluziŭnyja pravy na srodak suprać COVID-19, piša dw.com.
U razhar pandemii karanavirusa i vybarčaj kampanii ŭ ZŠA Donald Tramp vyrašyŭ ździejśnić u Hiermanii ździełku ŭ duchu svajho lubimaha łozunhu «Amieryka najpierš» ( «America first»). U niadzielu i paniadziełak, 15-16 sakavika, hetaja historyja narabiła niamała šumu ŭ niamieckich ŚMI i sacyjalnych sietkach. I, napeŭna, budzie mieć jašče palityčnyja nastupstvy.
Pieradhistoryja. 3 sakavika haspadar Biełaha doma razam ź vice-prezidentam Majkam Piensam i členami ŭznačalenaha im štaba pa baraćbie suprać COVID-19 sustreŭsia z kiraŭnikami farmaceŭtyčnych i bijatechnałahičnych kampanij. Siarod zaprošanych top-mieniedžaraŭ byŭ i kiraŭnik niamieckaj firmy Curevac amierykaniec Daniel Manikieła. Tam jamu i zrabili prapanovu, ad jakoj jon, padobna, nie zmoh admovicca.
Sprava ŭ tym, što bijatechnałahičnaja firma Curevac intensiŭna pracuje ciapier nad stvareńniem vakcyny ad virusa SARS-CoV-2. Pavodle jaje ŭłasnych źviestak, jana ŭžo ŭ pačatku leta zmoža prystupić da kliničnych vyprabavańniaŭ hetaha šmatabiacalnaha srodku. Pry spryjalnym raźvićci padziej pryščepka mahła b być hatovaja da vosieni. Bolš za toje, kampanija paviedamlaje, što maje siertyfikavanaje ŭ śniežni 2019 hoda abstalavańnie, jakoje «za adzin vytvorčy cykł moža vypuskać da dziesiaci miljonaŭ ampuł z vakcynaj».
I voś u Vašynhtonie, u Biełym domie, amierykanskamu kiraŭniku hetaj niamieckaj firmy zrabili prapanovu arhanizavać prodaž kampanii (havorka, nibyta, išła pra 1 miljard dalaraŭ) ci chacia b zabiaśpiečyć Złučanym Štatam ekskluziŭnyja pravy na vakcynu i technałohiju jaje vyrabu. Donald Tramp, jak daviedałasia niamieckaja hazieta Welt am Sonntag, zachacieŭ mieć vakcynu «tolki dla ZŠA».
Praz vosiem dzion paśla sustrečy z amierykanskim prezidentam, 11 sakavika, Daniel Manikieła niečakana biez tłumačeńnia pryčyn pakinuŭ Curevac, a zamiest jaho staršynioj praŭleńnia kampanii znoŭ staŭ jaje stvaralnik bijołah Inhmar Chior.
U 2000 hodzie jon zasnavaŭ jaje va ŭzroście 32 hadoŭ u niamieckim univiersiteckim horadzie Ciubinhien paśla abarony dysiertacyi, u jakoj raspracavaŭ technałohiju vyrabu vakcyn i preparataŭ dla imunnaj terapii.
Adnak u 2018 hodzie Inhmar Chior adyšoŭ ad apieratyŭnaha kiravańnia biźniesam i ŭznačaliŭ naziralnuju radu firmy. I voś ciapier jon viarnuŭsia na raniejšuju pasadu, čaho, pavodle ŚMI, nastojliva dabivaŭsia asnoŭny inviestar kampanii. A heta 79-hadovy miljarder Dzitmar Chop (Dietmar Hopp), adzin z samych bahatych i viadomych niamieckich pradprymalnikaŭ.
U 1972 hodzie jon z čatyrma tavaryšami stvaryŭ ciapier najbujniejšuju ŭ Jeŭropie softviernuju kampaniju SAP, jakaja vyrablaje prahramnaje zabieśpiačeńnie dla kiravańnia biznes-pracesami. Jaje prahramami aktyŭna karystajucca siońnia, darečy, i ŭ postsavieckich krainach — Biełarusi, Rasii, Ukrainie, Kazachstanie.
Dzitmar Chop jašče ŭ 2000 hodzie ŭkłaŭsia ŭ Curevac i paŭtara dziesiacihodździ praktyčna ŭ adzinočku finansavaŭ navukovyja daśledavańni firmy, jakimi zajmajucca ciapier kala 450 jaje supracoŭnikaŭ.
U 2015 hodzie hrošy stali pastupać taksama ad dabračynnaha fondu, stvoranaha zasnavalnikam amierykanskaj kampanii Microsoft Biłam Hiejtsam i jaho žonki Mielindy — Bill & Melinda Gates Foundation.
Usiaho, pavodle źviestak Frankfurter Allgemeine Zeitung, u hetuju bijatechnałahičnuju kampaniju, jakaja pa-raniejšamu pracuje ŭ minus, było inviestavana prykładna 550 miljonaŭ jeŭra. Ale ciapier Curevac, mahčyma, staić na parozie stvareńnia mienavita toj vakcyny, u jakoj bolš za ŭsio maje patrebu čałaviectva.
I mienavita ŭ hety momant vašynhtonskaja administracyja robić sprobu pierakupić kamandu jaje stvaralnikaŭ. Pra heta 15 sakavika padrabiazna raspaviała niadzielnaja hazieta Welt am Sonntag. A ŭviečary taho ž dnia pryjšła zajava Dzitmara Chopa, jaki zrabiŭ toje, što zvolnieny Daniel Manikieła nie zmoh ci nie zachacieŭ zrabić u Vašynhtonie.
Dzitmar Chop vyklučyŭ pradastaŭleńnie ekskluziŭnaha prava na srodak suprać COVID-19 jakoj-niebudź adnoj krainie. «Kali nam, jak ja spadziajusia, chutka ŭdasca raspracavać dziejsnuju vakcynu suprać karanavirusa, užyvać jaje dla abarony ludziej treba budzie nie rehijanalna, a salidarna va ŭsim śviecie», — padkreśliŭ miljarder.
I dadaŭ, što jon byŭ by rady, kali b takaja dapamoha pryjšła da ludziej z Hiermanii dziakujučy jaho šmathadovym inviestycyjam.
Intryha vakoł firmy Curevac vyklikała burlivuju reakcyju ŭ palityčnym Bierlinie. Ministr zamiežnych spraŭ FRH Chajka Mas zajaviŭ, što «hety virus my zmožam pieramahčy tolki sumiesna, a nie adzin suprać adnaho». Niamieckija navukoŭcy, adznačyŭ jon, zajmajuć viadučyja pazicyi ŭ spravie raspracoŭki lekaŭ i vakcyn, supracoŭničajučy sa śpiecyjalistami va ŭsim śviecie. «My nie možam dapuścić, kab chtości sprabavaŭ ekskluziŭna zavałodać vynikami ich navukovych daśledavańniaŭ», — padkreśliŭ kiraŭnik MZS.
Anałahična vykazaŭsia ministr ekanomiki Hiermanii Pieter Altmajier, padkreśliŭšy, što «Niamieččyna nie raspradajecca».
Dadatkovuju pikantnaść usioj hetaj historyi nadaje toje, što ŭ apošnija tydni imia Dzitmara Chopa hučała ŭ Hiermanii zusim u inšym kantekście.
Suprać jaho nastrojenaja častka niamieckich futbolnych fanataŭ, jakija bačać u im simvał kamiercyjalizacyi sportu i jaho padparadkavańnia intaresam kapitalistyčnych mahnataŭ. Tamu na trybunach usio čaściej i čaściej źjaŭlalisia transparanty z pahrozami i abrazami ŭ adras Chopa — sponsara i ŭłaśnika futbolnaha kłuba «Chofienchajm».
I jaki raptam niečakany pavarot z-za karanavirusa! Prapanova Trampa była b pryvabnaj ździełkaj dla inviestara, zacikaŭlenaha ŭ chutkaj nažyvie, piša Frankfurter Allgemeine Zeitung i praciahvaje: «Adnak Dzitmar Chopp adkazaŭ Donaldu Trampu admovaj. Mienavita tamu, što jon moža sabie heta dazvolić, hetyja navukovyja daśledavańni, padobna, zastanucca ŭ Hiermanii. Kali Curevac zdoleje ździejśnić praryŭ, hetamu čałavieku varta budzie pastavić pomnik».
