Kali kiraŭniki apazicyjnych palityčnych struktur damovilisia pra zapusk pracedury vybaru adzinaha kandydata, mnohija naziralniki byli ščyra ździŭlenyja. Mała chto vieryŭ, što palityčnyja partyi, jakija apošnija paŭtara dziesiacihodździ kiravalisia svaimi partykularnymi, časam kłubnymi intaresami mohuć damovicca pra doŭhaterminovyja kalektyŭnyja dziejańni.
Aptymizm, adnak, unušaŭ toj fakt, što apazicyjnyja struktury pakinuli za dužkami jak tych, chto zrabiŭ staŭku na ŭrastańnie ŭ aŭtarytarny režym, jak «Havary praŭdu» Dźmitryjeva i Karatkievič, tak i krai apazicyjnaha palityčnaha śpiektru, ad Zianona Paźniaka da postkamunistaŭ Kalakina, kaalicyja ź jakimi zaŭsiody nahadvała hibryd vuža i vožyka.
Prajmieryz startavali va ŭmovach infarmacyjnaj błakady z boku ŭładaŭ i bojazi dakranacca da apazicyi z boku biznesu — u vyniku čaho apazicyja pravodzić vybary z paraj socień jeŭra ŭ kišeni. Ale pry hetym biez represij. Na schody ŭ Viciebskaj vobłaści prychodziŭ pieravažna ćviordy apazicyjny aktyŭ. Pastupova aktyŭnaść da pracesu narastała.
Kali apazicyjny karavan u vyhladzie mikraaŭtobusa koleru šery mietalik pierajechaŭ na Paleśsie, zdaryłasia toje, čaho nichto ŭ apazicyi nie čakaŭ.
Pavodle infarmacyi namieśnika kiraŭnika Partyi BNF Alaksieja Janukieviča, na apazicyjnyja pieradvybary ŭ Stolinie i Drahičynie pryjšli, siarod inšych, nastupnyja ludzi, jakija raniej nie byli zaŭvažanyja ŭ padtrymcy niezaležnaha hramadstva:
— pieršy sakratar RK HA «Biełaruski respublikanski sajuz moładzi»,
— dyrektar haradskoha Doma kultury,
— śpiecyjalist adździeła pa adukacyi rajvykankama,
— hałoŭny śpiecyjalist rajvykankama,
— redaktar rajonnaj haziety,
— Dyrektar KUKP «Kinavideasietka» rajona,
— supracoŭnik adździeła ideałahičnaj raboty, kultury i pa spravach moładzi,
— kiraŭnik teatralnaha kalektyvu HDK,
— mastacki kiraŭnik ansambla tanca HDK,
— kiraŭnik instrumientalnaha ansambla DUA «… dziciačaja škoła mastactvaŭ»,
— piedahoh rajonnaha centra dziciačaj tvorčaści,
— hałoŭny zachavalnik fondaŭ vajenna-histaryčnaha muzieja,
— hramadski inśpiektar pa achovie pracy, rajonny centr dziciačaj tvorčaści,
— dyrektar … siaredniaj škoły,
— namieśnik načalnika pa ideałahičnaj pracy pahraničnaha pasta,
— člen vybarčaj kamisii ad rajonnaj arhanizacyi hramadskaha abjadnańnia «Biełaruski fond miru»
— člen vybarčaj kamisii ad hramadskaha abjadnańnia «Biełaruski respublikanski sajuz moładzi» i h.d.
Arhanizatary apazicyjnych pieradvybaraŭ nie raźličvali na takoje.
«Kali pradstaŭniki niekatorych arhanizacyj u Radzie Narodnaha hałasavańnia nie ličać zahannym užyvańnie miascovaj viertykallu administratyŭnaha resursu dziela zabieśpiačeńnia hałasavańnia na karyść adnaho z kandydataŭ — heta sapraŭdy prablema i padstava ličyć prajmieryz nielehitymnym pracesam», — miarkuje Alaksiej Janukievič z Partyi BNF.
«I dzie tut prablema? Pryjšli, skarystalisia svaim pravam i prahałasavali. Hałasavańnie ž narodnaje, a nie mižsabojskaje», — paryruje jamu sacyjał-demakrat Ihar Barysaŭ.
«Jak možna vyrašyć hetuju prablemu? Zaklikać bolšuju kolkaść svaich prychilnikaŭ prychodzić na sustrečy, kab pierakryć ideołahaŭ. Ale znoŭ-taki my sutykajemsia z karanavirusam, i ŭ takich umovach nie možam zaprašać ludziej. Atrymlivajecca zamknionaje koła, jakoje my mahli parvać siońnia, ale nie atrymałasia», — havoryć Pavieł Sieviaryniec z Chryścijanskaj demakratyi, jakija išoŭ na pieršym miescy pa kolkaści atrymanych hałasoŭ. Sieviaryniec pryniaŭ rašeńnie źniacca z prajmieryz.
«Paša [Sieviaryniec] vielmi mocna paškodziŭ svajoj reputacyi, — piša ŭ fejsbuku analityk Jury Drakachrust. — Tłumačeńni mohuć być lubyja. Ale pačaŭ hulać, tryumfalna vyjhravaŭ, potym paru razoŭ prajhraŭ — i vyjšaŭ z hulni. Voś heta zapomnicca, takaja łohika palityki. A virus nie virus — moh prapanavać abviaścić paŭzu, pierajści na anłajn, na trascu z chaleraj. Cikava, a kali b jon u Stolinie i ŭ Drahičynie vyjhraŭ, jon by taksama spyniŭ hulniu? Nu i druhi matyŭ, nakont vykankamaŭcaŭ — heta naahuł chavajsia ŭ bulbu. Takoje ščyraje ździŭleńnie — a jany chiba biełarusy? Chto b moh padumać, i ŭ hałavu ž nie prychodziła».
Tak adnym niachitrym krokam ułady zdoleli pasiejać niedavier miž lidarami apazicyi i, pa sutnaści, paralizavać praceduru pieradvybaraŭ.
Pytańnie ŭ tym, što alternatyvy hetaj chaj sabie i niedaskanałaj pracedury pa kryštalizacyi apazicyjnaha lidarstva niama.
