Brytanski ŭrad vyrašyŭ vyłučyć 330 młrd funtaŭ sterlinhaŭ na padtrymku biznesu, jaki paciarpieŭ ad uspyški karanavirusa, zajaviŭ ministr finansaŭ krainy Ryšy Sunak. Hetuju sumu nazyvajuć biesprecedentnaj: jana składaje kala 15% brytanskaha VUP i bolš za tracinu biudžetu karaleŭstva, piša BBC.
Pa słovach Sunaka, dapamoha takoha maštabu była b niejmaviernaj jašče niekalki tydniaŭ tamu. Ale karanavirus — heta «nadzvyčajnaja situacyja i dla hramadskaha zdaroŭja, i dla ekanomiki», a tamu «ŭrad budzie padtrymlivać luby biznes, i vialiki, i mały», zapeŭniŭ ministr.
Kali hetych hrošaj nie chopić, urad, pa słovach Ryšy Sunaka, zmoža vyłučyć dadatkovuju finansavuju dapamohu.
«Luby pradprymalnik, jakomu buduć patrebnyja hrošy dla apłaty arendy, vypłaty zarobkaŭ i inšych vydatkaŭ, zmoža atrymać kredyt na dobrych umovach», — skazaŭ Ryšy Sunak.
Urad rychtujecca, u pryvatnaści, padtrymać avijakampanii i aeraporty, jakija najbolš mocna paciarpieli ad uviadzieńnia ŭ roznych krainach karancinu i zakryćcia miežaŭ.
Nie mienš mocna ad karanavirusa paciarpieli paby, kłuby i teatry. Im urad vydzielić razavyja hranty ŭ pamiery da £25 tys., kab jany zmahli pieražyć hety niaprosty čas i nie zhaleć.
Inšy mały biznes moža raźličvać na razavyja hranty ŭ pamiery da £10 tys.
Taksama čakajecca, što biznes na čas budzie vyzvaleny ad vypłaty municypalnaha padatku.
Domaŭładalnikam, jakija majuć finansavyja ciažkaści, urad dazvoliŭ try miesiacy nie płacić pa ipatečnych kredytach.
