«Dumaŭ, što viazuć u les, dzie kryvavaja hebnia spalić mianie ŭ krematoryi», — z humaram apisvaje jon svaje ŭražańni pry pieravozcy.
«Me and COVID-19» — «Ja i COVID-19». Tak nazvaŭ svoj kanał chłopiec ź Minska, kali 15 sakavika ŭnačy jaho zabrali na karancin. Praz sutki vyjaviłasia, što niezdarma zahrabli. Analiz pakazaŭ karanavirus, i chłapčuka pieravieźli ź izalacyi ŭ Baraŭlanach u infiekcyjonku.
Uvieś hety čas jon viadzie svoj kanał — z humaram i pazityvam (i amal biez łajanki).
Biełaruskija daktary dziejničali biez pramarudžvańnia, chłopca padniali ŭnačy, jak tolki vyjavili, što jon byŭ kantaktam «pieršaha koła».
«Učora a hadzinie nočy mnie patelefanavali z epidemijałohii, vyjaviłasia, što ŭ majho siabra stanoŭčy test na karanavirus, a my niadaŭna viarnulisia razam z Polščy. Skazali, što ja kantakt pieršaha ŭzroŭniu, adpraŭlajuć na karancin i ja budu rabić analizy na karonu», — pisaŭ chłopiec učora.
U suviazi z toj atmaśfieraj niedahavorak, jakoj supravadžali epidemiju dziaržaŭnyja orhany i ŚMI minułyja dni, adčuvańni ŭ chłopca byli śpiecyfičnyja, jon sam heta apisaŭ z humaram:
«Ja jechaŭ u svajoj vopratcy i ŭ mascy. Kali jechaŭ, dumaŭ, što viazuć u les, dzie kryvavaja hebnia spalić mianie ŭ krematoryi abo abkole čymści, i ja stanu daŭba.bam».
Tempieratury ŭ jaho spačatku nie było.
Raźmiaścili jaho ŭ špitali dla vieteranaŭ u Baraŭlanach, prystasavanym pad časovy punkt izalacyi ludziej z ryzykaj zaražeńnia.
«Daktary ŭsie ŭ śpiecchałatach, skazali myć ruki, apracoŭvać antysieptykam. Paciešna, što antysieptyk adrazu skončyŭsia, a myła prosta sp..dzili», — raskazvaje jon.
Čytajcie taksama: Miedyki minskaj traŭmatałohii, jakuju zrabili infiekcyjonkaj: «Vydali adzin kambiniezon i reśpiratar! I tak pracavać?»
Ludzi ŭ špitali majuć mahčymaść chadzić pa kalidorach, ale abaviazanyja pry hetym nasić maski, jakija razdajuć miedsiostry. Uvieś piersanał špitala nosić abarončyja kaściumy.
Aŭtar staŭ fud-błohieram mižvoli. Abied na karancinie
Kali pryjšoŭ stanoŭčy vynik proby, chłopcu nie adrazu skazali, što jon maje «karonu», spačatku raspytali pra koła kantaktaŭ i aktyŭnaść za apošnija dni. Tady paviedamili pra toje, što vynik analizu pazityŭny.
U infiekcyjonku na Krapotkina jaho vieźli ŭžo ŭ znakamitaj čyrvonaj kapsule, jakaja maje šancy stać simvałam hetaha hoda.
Čytajcie taksama: Čamu ŭ Italii pracent śmiarotnaści taki vysoki?
«Usia chvaroba praciakaje jak zvyčajnaje VRVI, pa toj pryčynie što pacyjent małady, uskładnieńniaŭ nie pavinna być, ale sto pracentnych harantyj dać nielha», — skazaŭ chłapčuku doktar.
Usiaho pa stanie na siońnia ŭ Biełarusi paviedamili pra 36 vypadkaŭ zachvorvańnia na karanavirus. 35 ź ich — lohkija. Pakul naša kraina zastajecca na pieryfieryi pandemii kavarnaha virusa, ad jakoha ŭ śviecie pamierła ŭžo 8000 čałaviek.
Čytajcie taksama: Biznesmien pryvioz karanavirus u Minsk. Praź jaho ŭ karancin trapili daktary «Łade», studenty BDU, vučni himnazii №20 i paračka tenisistaŭ
