Padčas pieramoŭ ab intehracyi Biełarusi i Rasii Maskva prapanoŭvała stvaryć 12 nadnacyjanalnych orhanaŭ, u tym liku adziny emisijny centr, padlikovuju pałatu, sud sajuznaj dziaržavy i adziny mytny orhan, vyśviatliŭ rbc.ru.
Na pieramovach ab pahłyblenaj intehracyi ź Biełaruśsiu Maskva prapanoŭvała pačać pracu nad stvareńniem 12 nadnacyjanalnych orhanaŭ. U ich liku — adziny emisijny centr, jaki praduhledžvaje ŭviadzieńnie adzinaj valuty, padlikovaja pałata i sud sajuznaj dziaržavy, adziny mytny orhan, adziny orhan pa ŭliku ŭłasnaści sajuznaj dziaržavy, adzinyja padatkovy i antymanapolny orhany, a taksama adzinyja rehulatary pa nastupnych napramkach: u halinie transpartu, pramysłovaści, sielskaj haspadarki, suviazi, plus rehulatar abjadnanych rynkaŭ hazu, nafty i elektraenierhii. Pra heta RBK raspaviali try krynicy, znajomych z chodam pieramovaŭ.
Stvareńnie hetych orhanaŭ ahavorvajecca ŭ apošniaj, tak zvanaj 31-j «darožnaj karcie» pa intehracyi dźviuch krain.
U dakumiencie taksama idzie havorka ab raspracoŭcy «darožnych kart», jakija tyčacca sumiesnaj stratehii Rasii i Biełarusi ŭ śfiery abarony, stvareńnia ahulnych bankaŭ danych pravaachoŭnych orhanaŭ, unifikacyi zakanadaŭstva, jakoje rehuluje dziejnaść pravaachoŭnych struktur i śpiecsłužbaŭ.
Adnak letam-vosieńniu 2019 hoda Uładzimir Pucin i Alaksandr Łukašenka damovilisia zasiarodzicca na abmierkavańni 30 «kart», pryniać ich pakietam, a ŭžo paśla, mahčyma, viarnucca da prapracoŭki 31-j «karty», raspavioŭ RBK inšy surazmoŭca, znajomy z chodam pieramovaŭ ab intehracyi. Zaraz jany pastaŭlenyja na paŭzu pa inicyjatyvie Minska, dadaje jon.
U rasijskim uradzie sprabujuć źviazać rašeńnie ekanamičnych prablem intehracyi z palitykaj i stvareńniem nadnacyjanalnych orhanaŭ, adnak była damoŭlenaść pieramovy pra heta nie vieści, zajaviŭ Łukašenka ŭ intervju «Rechu Maskvy» 24 śniežnia minułaha hoda. Za dzień da hetaha ŭpieršyniu stała viadoma pra isnavańnie 31-j «darožnaj karty». Pra jaje raspavioŭ Dźmitryj Miadźviedzieŭ.
