Hałoŭnaha redaktara anłajn-vydańnia «Ježiednievnik» Siarhieja Sacuka zatrymali pa padazreńni ŭ atrymańni chabaru. Razmova nibyta pra 5 tysiač dalaraŭ, jakija jon uziaŭ za napisańnie rasśledavańnia pra karupcyju ŭ Minzdaroŭja. Sacuku inkryminujuć častku 2 artykuła 430 (atrymańnie chabaru paŭtorna, albo šlacham vymahalnictva, albo hrupaj asobaŭ pa papiaredniaj zmovie, albo ŭ bujnym pamiery).
Fota sa staronki ŭ fejsbuku.
Niezvyčajnaja situacyja, kali pieradaču hrošaj ad adnaho biznesoŭca druhomu razhladajuć jak chabar słužbovaj asobie.
«NN» paprasiła jurysta patłumačyć, jak takoje mahčyma.
Advakat Anton Hašynski kaža, što farmalna takoje całkam mahčyma.
Kab biznesoŭcu asudzić za chabar jak słužbovuju asobu, pavinny vykonvacca dźvie ŭmovy — kab čałaviek mieŭ arhanizacyjna-rasparadčyja funkcyi (hruba kažučy, byŭ kiraŭnikom) i toje, što jon rabiŭ za dadatkovuju nielehalnuju apłatu, uvachodziła ŭ jaho abaviazki.
Ale ŭ spravie Sacuka pakul šmat niajasnych momantaŭ.
«Kali chabar byŭ, to pytańnie: u suviazi z čym jon jaho braŭ i što za heta rabiŭ? Kali jon vykonvaŭ dziejańni, jakija ŭvachodziać u jaho słužbovyja abaviazki (umoŭna kažučy, atrymlivaŭ hrošy źvierch damovy za toje, što pisaŭ artykuły), to heta moža razhladacca jak chabar słužbovaj asobie. Kali b jon byŭ prosta žurnalistam, była b inšaja sprava».
Anton Hašynski ŭzhadvaje precedenty, kali pryvatnikaŭ sudzili za atrymańnie chabaru. Naprykład, kali dyrektar pradpryjemstva pa drevaapracoŭcy dapłačvaŭ biznesoŭcu, kab toj svoječasova adhružaŭ jamu syravinu. Heta rascanili jak chabar.
Takoje, jak praviła, zdarajecca, kali sprava traplaje na kantrol na vysokim uzroŭni. Bo zvyčajna, kali ŭ historyi nie zamiašany dziaržaŭnyja struktury, artykuł 430 nie inkryminujuć.
