Unačy 1 krasavika ŭ Kapylskaj rajonnaj balnicy pamierła 70-hadovaja pacyjentka Natalla Arłova. Jana była ź vioski Doktaravičy, dzie zafiksavali ŭspyšku karanavirusa.
Natalla Arłova. Fota z ok.ru.
Pra heta «Našaj Nivie» stała viadoma jak z kołaŭ, blizkich da miedykaŭ, tak i ad miascovych žycharoŭ. «Pamierła, paviazuć u Minsk na kremacyju», — skazali nam u Doktaravičach.
Sprava ŭ tym, što jašče 29 i 30 sakavika ŭ vioskach Doktaravičy, Novyja Doktaravičy i Vuhły Kapylskaha rajona pracavali miedyki ŭ kaściumach śpiecadzieńnia. Ludziej papiaredžvali pra toje, što nie treba vychodzić na vulicu biez patreby. U mnohich žycharoŭ brali mazki na karanavirus. Častku ludziej paśla adpravili ŭ balnicy Minska, Barysava i Kapyla.
Siarod pieršych chvorych ź pnieŭmanijaj była nastaŭnica anhlijskaj movy Natalla Arłova. U Kapyl jaje dastavili ŭ ciažkim stanie, tamu navat nie pieravodzili ŭ Minsk. Jaje žyćciadziejnaść padtrymlivali z dapamohaj adzinaha ŭ rajonie aparata štučnaj vientylacyi lohkich.
Natalla Arłova naradziłasia ŭ 1949 hodzie ŭ Baku. Dziavočaje proźvišča — Piačonava. Vučyłasia ŭ Piacihorskim linhvistyčnym univiersitecie. Doŭhi čas z mužam žyła ŭ Minsku, a kali vyjšła na piensiju, to pierabrałasia ŭ Doktaravičy, dzie žyvie jaje brat. Pracavała ŭ škole, dzie vykładała anhlijskuju movu ŭ piatym i dziaviatym kłasach.
Škołu ŭ Doktaravičach zakryli na karancin, mnohich dziaciej vazili ŭ rajonny centr, kab zdać analizy.
Staršynia Kapylskaha rajvykankama Siarhiej Piliščyk u razmovie z «Našaj Nivaj» adznačaŭ, što Natalla Arłova sapraŭdy była špitalizavana, ale na ciapierašni momant nie viedaŭ jaje stanu. «Nas nie infarmujuć», — kazaŭ Siarhiej Piliščyk.
«Usie kamientary pa karanavirusie daje ministr achovy zdaroŭja. Pres-słužba daść vyčarpalnuju infarmacyju. Karancinu na terytoryi rajona niama, u nas chodzić transpart, pracujuć usie abjekty», — skazaŭ Siarhiej Piliščyk 31 sakavika.
Pavodle infarmacyi «Našaj Nivy», usie inšyja pacyjenty ŭ Kapyli pačuvajuć siabie narmalna, pahrozy ich žyćciu niama.
Čytajcie taksama
Śmierć ad karanavirusa: zasłužany artyst Biełarusi Viktar Daškievič
Jašče adna žančyna ź Viciebska śćviardžaje, što jaje mama pamierła ad karanavirusnaj pnieŭmanii
