U piatnicu dniom źjaviłasia infarmacyja, što ŭ Viciebsku za sutki ad pnieŭmanii pamierli dva čałavieki. Adzin ź ich miedrabotnik. Žančynu zvali Śviatłana Kisialova. Joj było 47 hadoŭ. Jana pracavała miedsiastroj u Viciebskaj haradskoj kliničnaj balnicy №1. U Śviatłany zastalisia dvoje dziaciej. Anastasija, jakoj 27, i 7-hadovaja Vieranika, piša Tut.by.
Śviatłana Kisialova
U narodzie Viciebskuju haradskuju kliničnuju balnicu №1 nazyvajuć «trestaŭskaj». Tut, kaža dačka miedsiastry Anastasija Kisialova, jaje mama prapracavała bolš za 20 hadoŭ.
— Mama pracavała ŭ nieŭrałohii, — raspaviadaje Nasta. — Dzieści 13 sakavika pacyjentaŭ, jakija tut lažali, stali vypisvać. Skazali, buduć zavozić siudy VRVI i pnieŭmaniju. Pry hetym adrazu nijakich śpiecyjalnych chałataŭ abo akularaŭ miedykam nie vydavali. Tolki 15 hramaŭ śpirtu, jakimi paśla pracy jany apracoŭvali ruki. Doma ŭ nas byli reśpiratary, mama brała ich na pracu. Kazała, što niekatoryja miedsiostry dla achovy ŭkładvali ŭ adnarazovyja maski štodzionnyja prakładki, pramočanyja nastojkaj propalisu.
Spačatku, praciahvaje surazmoŭca, novyja pacyjenty zaniali prykładna paŭtara adździaleńnia. U nieŭrałohii, dzie pracavała Śviatłana, ich nie było. Ale miedsiaścior adsiul, uspaminaje Nasta, vyklikali na padmohu kaleham. Kolki mienavita mama była na padmozie, dačka nie pamiataje.
— Kožnyja vychadnyja mama brała dadomu pamyć svaju pracoŭnuju formu, — uspaminaje dačka. — Paśla taho jak u ich u lakarni pamierła 58-hadovaja pacyjentka (Ministerstva achovy zdaroŭja paviedamiła, što test na karanavirus u jaje pakazaŭ admoŭny vynik. — Zaŭv. Red.), joj i inšym miedsiostram było strašna nieści dadomu svaju formu. Tady starejšaja miedsiastra paraiła kaleham spačatku zamačyć usio ŭ chłorku i tak vieźci.
Čytajcie taksama: U Viciebsku pamierła 58-hadovaja žančyna ź pnieŭmanijaj. Svajaki: U jaje byŭ karanavirus. Minzdaroŭja: Covid-19 nie było
Dniom 24 sakavika na pracy ŭ Śviatłany padniałasia tempieratura — 37,3, i jaje adpravili na balničny. Na balničnym, adznačaje dačka, mama prabyła niedzie tydzień. Lepš nie stanaviłasia, jana paprasiła zrabić zdymak. Praź dźvie hadziny paśla hetaha, uspaminaje Nasta, mamie paviedamili, što ŭ jaje pnieŭmanija i treba kłaścisia ŭ balnicu.
U paniadziełak, 30 sakavika, jaje špitalizavali ŭ svaju ž Viciebskuju haradskuju kliničnuju balnicu №1.
— Jana mnie skazała, što dyjahnaz u jaje byŭ «dvuchbakovaja bronchapnieŭmanija». Kali ja ŭ jaje spytała, dzie jana mahła zarazicca, jana adkazała: «Na pracy», — viartajecca da tych padziej dačka. — Pakul mama lažała ŭ balnicy, my razmaŭlali kožny dzień. Ja ŭ jaje tady pytałasia: «Vašu balnicu narešcie apranuli?» Jana adkazała: «Tak, chodziać jak śniehaviki, dali adnarazovyja «papiarovyja» chałaty».
Pa słovach dački, tempieraturu mamie źbivali ŭkołami. Akramia taho, joj kapali mocnyja antybijotyki, ad jakich, uspaminaje dačka, Śviatłanu vanitavała.
— U čaćvier viečaram jana mnie napisała, što ŭ jaje adychodzić makrota. Heta, skazała, dobra, ale adčuvała jana siabie drenna. Skardziłasia na antybijotyk. Ale joj skazali, kali tempieratura nie budzie prychodzić u normu, leki zamieniać… U piatnicu nočču (u noč z čaćviarha na piatnicu. — Zaŭv. Red.) nam paviedamili, što jana pamierła…
U paśviedčańni, jakoje vydali siamji paśla ŭskryćcia, napisana, što pryčyna śmierci Śviatłany — «vostraja reśpiratornaja niedastatkovaść».
— Joj rabili test na karanavirus?
— Tak, u aŭtorak, ale vynikaŭ nam nichto nie paviedamlaŭ. U hrafie «Patałahičnyja stany (zachvorvańni), jakija vyklikali abo jakija abumovili niepasrednuju pryčynu śmierci», napisana: «Nie ŭdakładniena». Lekar nam skazaŭ, heta pra karanavirus.
U piatnicu, 3 krasavika, padčas abłasnoha štaba pa baraćbie z raspaŭsiudžvańniem karanavirusa namieśnik načalnika Viciebskaha abłasnoha ŭpraŭleńnia achovy zdaroŭja Mikałaj Kaśpirovič, nie nazyvajučy proźvišča, paviedamiŭ pra śmierć miedrabotnika. Žančyna, skazaŭ jon, lačyłasia ad ciažkaj dvuchbakovaj pnieŭmanii virusna-bakteryjalnaha hieniezu. Pakul niama paćvierdžanych vynikaŭ najaŭnaści RNK karanavirusa, adznačyŭ pradstaŭnik upraŭleńnia.
— Da hetaj situacyi vaša mama na štości chvareła?
— Nijakich zachvorvańniaŭ, źviazanych ź lohkimi, u jaje nie było.
U piatnicu viečaram, kaža Nasta, jaje ajčyma z tempieraturaj 39 zabrali ŭ balnicu. Skazali, što ŭ jaho VRVI. Jamu zrabili test na karanavirus.
— Mnie pieradali mamčyn telefon. Apoŭnačy pierad śmierciu jana pisała, što paprasiła pieravieści jaje ŭ reanimacyju, ale pieraviali jaje tolki da 2-j hadziny, — nie strymlivaje emocyj dziaŭčyna. — Mama vielmi lubiła miedycynu i svaju spravu. Jana ŭsio žyćcio pracavała ŭ adnoj lakarni, ale ŭ ciažkaj sytuacyi dziaržava nie pakłapaciłasia pra miedykaŭ. Miedrabotnik pamior. Maja 7-hadovaja siastra zastałasia biez mamy.
