Fota Nadziei Bužan
Ministerstva adukacyi praciahvaje manitoryć situacyju — na siońnia kala 40% vučniaŭ hatovyja pryjści ŭ škoły, astatnija addajuć pieravahu dystancyjnamu navučańniu, paviedamiła siońnia načalnik upraŭleńnia ahulnaj siaredniaj adukacyi Iryna Karžova padčas anłajn-kanfierencyi na sajcie BIEŁTA.
«Siońnia kala 40% navučencaŭ hatovyja sieści za partu i praciahnuć navučańnie ŭ čaćviortaj čverci. Dla navučencaŭ, jakija pa zajavie baćkoŭ nie pryjduć u škoły, my vyvučajem mahčymaść arhanizacyi adukacyjnaha pracesu z vykarystańniem infarmacyjnych technałohij», — adznačyła Iryna Karžova.
Pavodle jaje źviestak, bolš za 90% ustanoŭ adukacyi majuć chutkasny internet, bolš za 85% technična hatovyja pačać navučańnie dystancyjcna. Pry hetym 85% nastaŭnikaŭ hatovyja vykładać z vykarystańniem infarmacyjnych technałohij i bolš za 75% navučencaŭ hatovyja pačać navučańnie dystancyjna.
«Dla tych, chto pryjdzie ŭ škołu i siadzie za party, my hatovyja pačać zvyčajny adukacyjny praces — vočna, u tradycyjnym režymie. Ministerstva adukacyi sumiesna z Nacyjanalnym instytutam adukacyi ŭ dapamohu nastaŭniku adkarektavała kalandarna-tematyčnaje płanavańnie, kab zaviaršyć navučalny hod va ŭstanoŭlenyja terminy i pravieści atestacyju vučniaŭ», — skazała Iryna Karžova.
Tych, chto nie hatovy prystupić da zaniatkaŭ vočna, Ministerstva adukacyi prapanuje pieravieści na indyvidualny vučebny płan.
Jak patłumačyła Iryna Karžova, heta nie novaja forma, jana znajomaja nastaŭnikam, ustanovam adukacyi i baćkam. «Asablivaść budzie zaklučacca ŭ tym, što pry pieravodzie na indyvidualny vučebny płan budzie zabiaśpiečana supravadžeńnie navučańnia nastaŭnikam. Supravadžeńnie budzie praduhledžvać dastaŭku vučniu asnoŭnaha abjomu vyvučajemaha materyjału, interaktyŭnaje ŭzajemadziejańnie navučencaŭ i nastaŭnikaŭ, pradastaŭleńnie školniku mahčymaści samastojnaj pracy pa zasvajeńni materyjału, kantrol viedaŭ i navykaŭ navučenca», — patłumačyła pradstaŭnik Minobra.
Kanały ŭzajemadziejańnia — elektronnaja pošta, sajt ustanovy adukacyi, Skype, Viber — budzie vybirać škoła ŭ zaležnaści ad śpiecyfiki, mahčymaściaŭ, techničnaha abstalavańnia.
Iryna Karžova źviarnuła ŭvahu, što Minadukacyi hatova da roznych varyjantaŭ, zychodziačy ź situacyi, tamu rašeńnie pa dalejšaj arhanizacyi adukacyjnaha pracesu budzie pryniata ŭ najbližejšy čas z ulikam usich rekamiendacyj Ministerstva achovy zdaroŭja.
«Siońnia ŭstanovy adukacyi znachodziacca na vakacyjach, i ja chaču źviarnuć uvahu, što škoła nie začynienaja, nastaŭniki pracujuć. U dapamohu baćkam, jakija nie mohuć pakinuć dziaciej doma, u škole pracujuć łahiery. Ich naviedvajuć bolš za 3 tys. dziaciej», — udakładniła jana.
