Praz epidemiju karanavirusu na darohach pamiž Łunincam i Pinskam vystaŭlenyja patruli milicyi. Na kožnym jość taksama supracoŭnik centru hihijeny i epidemijalohii. Jon mieraje temperaturu kiroŭcaŭ i pasažyraŭ i praviaraje, ci niama hetych ludziej u śpisie tych, chto musić znachodzicca ŭ samaizalacyi. Ź miesca pieradajuć karespandenty «Svabody».
Pasty vystavili adnačasova DAI Pinskaha i Łuninieckaha rajonaŭ. Jany stajać na dźviuch darohach, jakija złučajuć Łuniniec i Pinsk.
«U noč z čaćviarha na piatnicu nas siudy vyklikali, — skazaŭ epidemijolah na adnym z pastoŭ. — Kruhłyja sutki staim u dźvie źmieny pa 12 hadzinaŭ».
Supracoŭniki DAI prypyniajuć mašyny, pytajucca pra samaadčuvańnie kiroŭcaŭ. Potym epidemijolah praviaraje temperaturu i praviaraje, ci čałavieka niama ŭ śpisie tych, chto musić być u samaizalacyi.
«Nas najpierš cikaviać łuninieckija», — tłumačać specyjalisty.
Učora haradzkija ŭłady Pinsku paprasili miascovych žycharoŭ u peryjad śviataŭ nie vyjaždžać za miežy horadu, asabliva ŭ Łuniniecki rajon.
«Vyrašyli paprasić i haściej, i pinčukoŭ ustrymacca ad pajezdak z horadu i ŭ horad jak maha bolš. Kali tolki ŭžo niejkija važnyja pryčyny», — skazała «Svabodzie» kiraŭnica adździełu idealahičnaj pracy Pinskaha rajvykankamu Valancina Kułak.
U Bieraściejskaj vobłaści najbolš vypadkaŭ karanavirusu zafiksavali ŭ Łuninieckim rajonie. Apošni raz aficyjnaja statystyka pa Łunincy publikavałasia 8 krasavika. Zhodna ź joj, COVID-19 byŭ paćvierdžany ŭ 26 čałaviek. 15 krasavika stała viadoma, što va ŭsioj Bieraściejskaj vobłaści vyjaŭlenyja 73 vypadki karanavirusu.
U kolkich dakładna čałaviek vyjavili karanavirus, ułady ciapier nia kažuć. U śpisie epidemijolahaŭ, jakija dziažurać na darohach razam ź milicyjaj, — kala sta piacidziesiaci čałaviek, jakija pavinny być u samaizalacyi.
Za dva dni sumiesnyja patruli milicyi i epidemijolahaŭ znachodzili ludziej, jakim zabaroniena vyjaždžać z Łuninca. Ich razvaročvali i viartali nazad, paviedamlali u łuninieckim centar hihijony i epidemijalohii, što vyjavili parušalnikaŭ samaizalacyi.
«Ja liču, što heta pravilna, pavinna być niejkaja adkaznaść», — ličać miascovyja epidemijolahi.
U abviestcy pinskaha harvykankamu išła havorka, što heta časovyja miery napiaredadni śviataŭ. U noč z suboty na niadzielu pravasłaŭnyja adznačajuć Vialikdzień, šmat chto ŭ hety čas naviedvaje svajakoŭ u inšych rehijonach. Hetuju infarmacyju paćviardžajuć i epidemijolahi. Jany kažuć, što ŭ paniadziełak pasty pavinny prybrać.
U Biełarusi aficyjna nie abvieščany karantyn praz epidemiju karanavirusu. Łuniniecki i Pinski rajon — pieršyja, dzie ŭviedzienaja pravierka na darohach supracoŭnikami milicyi i centraŭ hihijeny i epidemijalohii.
