TASS
Biełaruś i Polšča pačynajuć supracu ŭ śfiery enierhietyki, jość damoŭlenaści ab pastaŭkach u Biełaruś nafty, paviedamiŭ pasoł Polščy ŭ Biełarusi Artur Michalski 3 maja ŭ intervju dziaržaŭnamu telekanału «Biełaruś-1» z nahody hadaviny pryniaćcia Kanstytucyi Rečy Paspalitaj (3 maja 1791 hoda), piša «Radyjo Svaboda».
«U hetym vielmi dapamahaje aktyŭny palityčny dyjałoh pamiž našymi dziaržavami, — dadaŭ dypłamat. — My razumiejem patrebu Biełarusi ŭ dyviersyfikacyi krynic enierhii, my daŭno heta zrabili. My viedajem, što Biełaruś razmaŭlaje z mnohimi krainami, bałtyjskimi i Polščaj, nakont mahčymych tranzitnych šlachoŭ.
U palityčnym płanie ŭ Polščy jość vielmi dobrazyčlivyja adnosiny da hetaha pytańnia, i Polšča chacieła b być častkaj hetaha žadańnia Biełarusi dyviersifikavać krynicy enierhii».
Pa słovach Michalskaha, cikavaść dziełavych kołaŭ Polščy da Biełarusi raście — za apošni hod u Biełaruś pryjechali šmat polskich biznesoŭcaŭ.
«My źviazany karaniami ŭ roznych halinach i roznych vymiareńniach. My šmat robim, što spryjaje narodnaj dypłamatyi. My ŭśviedamlajem, što naša susiedstva važnaje, heta nie pahroza, a šaniec», — padkreśliŭ pasoł.
Polskich inviestaraŭ, pavodle jaho, pryvablivajuć roznyja haliny biełaruskaj ekanomiki — meblevaja industryja, ahrarnaja śfiera, IT-siektar.
Michalski adznačyŭ stanoŭčuju dynamiku ŭ ekanamičnym supracoŭnictvie dźviuch krain.
«U nas bolš za try miljardy dołaraŭ tavarazvarotu kožny hod. My ŭ dobrym stanoviščy, pakolki polskija inviestary šukajuć rynki. Susiedni rynak — heta, pa-pieršaje, vielmi zručna, ludzi vielmi dobra razumiejuć adno adnaho, pakolki našy movy — biełaruskaja i polskaja — padobnyja adna da adnoj», — skazaŭ pasoł Polščy.