Jaje analiz na COVID-19 išoŭ 9 dzion, analizy jaje muža nie hatovyja i praz 12 dzion. 30-hadovaja Hanna Jackievič ź Mikaševičaŭ pamierła 3 maja. Na zaŭtra jaje pachavali ŭ zakrytaj trunie, bo ŭ žančyny byŭ vyjaŭleny karanavirus.

Fota z vk.com/sajt horada Mikaševičy

Fota z vk.com/sajt horada Mikaševičy

«Naša Niva» pahavaryła z mužam i śviakroŭju Hanny. Pa ich słovach, chvarobu maładaja žančyna pryviezła z sanatoryja.

«30 sakavika jana pajechała ŭ sanatoryj «Śvitanak-Lubań». Prosta adpačyć, chvarob nijakich nie mieła.

Tam jana prabyła bolš za tydzień. 11 krasavika Hańnie stała kiepska, pavysiłasia tempieratura. Sama jana dumała, što prosta prastyła, — raspaviała «Našaj Nivie» śviakroŭ žančyny. — 14 krasavika muž jaje zabraŭ dadomu. Viarnulisia pozna ŭviečary, tamu ni z kim nie kantaktavali. A na nastupny dzień pajechali ŭ miascovuju balnicu. Tam spačatku skazali, što ŭsio bolš-mienš narmalna, maŭlaŭ, prychodźcie ŭ paniadziełak u palikliniku, ale, pahladzieŭšy zdymki, mierkavańnie źmianili. Hannu pasadzili ŭ chutkuju i pavieźli ŭ Łuniniec».

Spačatku ŭ žančyny dyjahnastavali levabakovuju pnieŭmaniju. Heta była adnosna lohkaja forma zachvorvańnia.

«U Łunincy dziciačaje adździaleńnie pierafarmatavali, tam ciapier lažać pa čatyry čałavieki ŭ pałacie ź pnieŭmanijami. Tudy pakłali i Hannu», — kažuć svajaki.

U łuninieckaj balnicy Hańnie zrabili analiz na «karonu». Jon pryjšoŭ tolki praz 9 dzion — i byŭ stanoŭčy.

«Kali jaje zabrali ŭ balnicu, nichto ničoha nam nie kazaŭ. Ja byłaja miedsiastra i sama zahadała synu ź dziećmi sieści na chatni karancin, my im pad dźviery nasili pradukty, — kaža śviakroŭ. — Jany prasiadzieli doma 9 dzion, tady stała viadoma, što ŭ Hanny «karona», i tady pryjechali dezynfiekavać chatu. Tady ž uziali analiz u muža — majho syna — i dziaciej Hanny. Heta było 23 krasavika, kali ja nie pamylajusia. Ale ich vynikaŭ i siońnia niama. Jany ahułam 19 dzion siadziać na karancinie. Što ź ich analizami, my nie viedajem. Jość u kaho ź ich «karona»? My ničoha nie viedajem. Kolki im jašče čakać? My nie viedajem».

Ahułam Hańnie rabili dva testy, kažuć svajaki, abodva paćvierdzili karanavirus.

Pa Mikaševičach ciapier raspaŭzajucca čutki, što ŭ łuninieckaj balnicy Hanna sustreła žančyn, ź jakimi adpačyvała ŭ sanatoryi. Svajaki heta abviarhajuć.

«Takoha nie było. Byŭ inšy momant: joj zvanili žančyny z sanatoryja, jakija taksama nibyta prastyli, skardzilisia, što zhubili niuch, majuć tempieraturu, — kaža śviakroŭ pamierłaj. — A ŭ Pinsku da nas padyšła doktarka i spytała, u jakim sanatoryi była Hanna. My kažam, što ŭ sanatoryi «Śvitanak-Lubań». Doktarka tolki skazała: «Nu, «Śvitanak» i daŭ nam…»

Raniej paviedamlałasia pra vypadki zaražeńnia karanavirusam i ŭ inšych sanatoryjach krainy. Ministr achovy zdaroŭja zhadvaŭ pra vialiki šlejf zaražanych z sanatoryja Ministerstva ŭnutranych spraŭ u Miadzielskim rajonie, a «Naša Niva» pisała pra vypadki ŭ sanatoryi «Praleska» ŭ Ždanovičach Minskaha rajona. Vyčarpalnaj statystyki, adnak, ułady nie publikavali.

Na piaty dzień znachodžańnia ŭ balnicy ŭ Hanny źjavilisia chrypy ŭ adnym lohkim, na nastupny dzień — u druhim. Joj pastavili dyjahnaz: dvuchbakovaje zapaleńnie.

«Paśla zrabili KT i vyznačyli stan jak ciažki. Pakłali ŭ reanimacyju na kisłarod, kab jana sama dychała. 22 krasavika Hannu pieravieźli ŭ Pinsk, tam taksama trymali ŭ reanimacyi na kisłarodzie. I raptoŭna joj stała horš. Tady pakłali pad aparat štučnaj vientylacyi lohkich, — kaža śviakroŭka. — 3 maja jana pamierła ŭ reanimacyi pinskaj balnicy».

Chavali Hannu ŭ zakrytaj trunie. Siabry žančyny nie navažylisia pryjści na pachavańnie.

Chraničnych zachvorvańniaŭ Hanna nie mieła, kaža śviakroŭ.

«Byŭ nizkavaty hiemahłabin i trochi prablemy pa hiniekałohii. Usio astatniaje ŭ normie — serca i lohkija całkam zdarovyja. U pinskaj balnicy nam dali papieru ab śmierci Hanny. Tam było napisana tak: sardečna-lohačnaja niedastatkovaść, virusnaja dvuchbakovaja pnieŭmanija i karanavirusnaja infiekcyja», — kažuć svajaki.

Hanna Jackievič pracavała ŭ dziciačym sadku pamočnicaj vychavacielki. U jaje zastałosia dvoje małych dziaciej. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?