«Usie raźjechalisia. Niama kamu pravodzić» — taki łapidarny adkaz dała pres-sakratarka Ministerstva achovy zdaroŭja Julija Vanina na pytańnie žurnalistaŭ, ci adbudziecca 8 maja kamunikacyja adkaznych asob Ministerstva z žurnalistami.
Paźniej 8 maja ŭ telehram-kanale Minzdaroŭja źjaviłasia paviedamleńnie, što ministr Uładzimir Karanik razam z hałoŭnaj doktarkaj Respublikanskaha kliničnaha miedycynskaha centra Irynaj Abielskaj dy inšymi kiraŭnikami sa śfiery achovy zdaroŭja ŭskłali kvietki da pomnika čyrvonaarmieŭcaŭ, jakija zahinuli kala vioski Padhorje Minskaha rajona ŭ červieni 1941 hoda.
Uładzimir Karanik z bukietam
Iryna Abielskaja ź viankom
Apošni raz bryfinh u Ministerstvie adbyŭsia 24 krasavika. Tady namieśnica ministra Alena Bohdan začytała padrychtavanuju infarmacyju i admoviłasia adkazvać na pytańni karespandentaŭ.
Pierad tym pres-kanfierencyja adbyłasia 17 krasavika z udziełam ministra achovy zdaroŭja Uładzimira Karanika. Na joj jon i jaho kalehi prykładna 45 chvilin vystupali z ustupnymi słovami, paśla čaho kala 10 chvilin adkazali na niekalki pytańniaŭ žurnalistaŭ — pry hetym vybirali sami, chto moža zadać pytańni.
Taja pres-kanfierencyja skončyłasia pratestami. Syn pamierłaha ŭ Barysavie fielčara źvinavaciŭ ministra ŭ chłuśni nakont jaho baćki. Ministr zajaviŭ, što ŭ pryčynie śmierci hetaha miedrabotnika jašče treba razabracca, na što syn prademanstravaŭ paśviedčańnie ab śmierci taty z ukazanym u im COVID-19.
Čytajcie taksama: «Kaho vy sprabujecie padmanuć? Što za končanaja dziaržava?» Syn pamierłaha fielčara pakazaŭ Karaniku paśviedčańnie ab śmierci taty
Akramia taho, žurnalisty vyjavili, što nazvanyja ministram Karanikam ličby chvorych pa rajonach Viciebskaj vobłaści ŭ razy razychodziacca z kolkaściu, abvieščanaj u toj ža dzień miascovymi ŭładami.
U bolšaści jeŭrapiejskich krain u čas pandemii ŭpaŭnavažanyja asoby sanitarnych słužbaŭ štodzionna infarmujuć hramadskaść pra situacyju. U mnohich krainach kiraŭniki viedamstva robiać heta asabista. Statystyka, u tym liku pa rajonach, nie składaje ŭ inšych jeŭrapiejskich krainach tajamnicy.
Pa aficyjnych źviestkach, pa stanie na 7 maja ŭ Biełarusi zafiksavana bolš za 20 tysiač vypadkaŭ karanavirusa.
Miarkujučy pa toj infarmacyi, jakaja dachodzić u ŚMI, najhoršaja situacyja skłałasia ŭ Viciebskaj vobłaści, Minsku, Stoŭbcach (Minskaja vobłaść), Baranavičach, Łunincy (Bresckaja vobłaść), Homieli, Buda-Kašalovie (Homielskaja vobłaść), Barysavie (Minskaja vobłaść). U Hrodzienskaj vobłaści tryvožnyja viestki prychodziać z Navahrudka. Pryčym, jak možna zrabić vysnovu, supastaŭlajučy najaŭnyja źviestki, u mnohich rehijonach kolkaść pnieŭmanij u šmat razoŭ pieravyšaje jak zvyčajnyja dla hetaha siezona pakazčyki, tak i aficyjna zarehistravanuju kolkaść vypadkaŭ karanavirusa. Apošnija aficyjnyja źviestki pra zahružanaść balnic i kolkaść špitalizavanych pacyjentaŭ ź pnieŭmanijaj prahučali 2 maja — tady ich było 12 800. Usie nastupnyja dni kolkaść vyjaŭlenych vypadkaŭ karanavirusa ŭ razy pieravyšała kolkaść vylečanych chvorych.
Učora stała viadoma, što da pryjomu karanavirusnych chvorych rychtujuć jašče adnu balnicu — Minskuju abłasnuju kliničnuju ŭ Baraŭlanach.
