Svaboda sustreła Paŭła Palejčyka la lidzkaha IČU i daviedałasia pra ŭražańni ad pieršaj u žyćci adsiedki.

Felčar Pavał Palejčyk byŭ zatrymany ŭviečary 7 traŭnia, kali paśla pracoŭnaj źmieny na «chutkaj» pryjšoŭ u lidzki RUUS paśla telefonnaha vykliku. Supracoŭnik milicyi pakazaŭ Paŭłu pratakoł ab udziele ŭ niedazvolenaj masavaj akcyi 22 krasavika, kali ŭ Lidu pryjaždžaŭ błohier Cichanoŭski. A paśla paviedamiŭ, što dadomu felčar siońnia ŭžo nia trapić.

«Mnie pazvanili, skazali prybyć u Lidzki RUUS dla dačy tłumačeńniaŭ, nakont schodu (22 krasavika padčas sustrečy z błohieram Cichanoŭskim — RS), — raskazvaje Pavał. — Usio, ja pajšoŭ. I adtul ja ŭžo nia vyjšaŭ. Toj supracoŭnik, jaki składaŭ pratakoł na mianie, sam ža i paviedamiŭ — načalnik zahadaŭ pakidać mianie «na sutki».

Pavodle Paŭła, u pratakole ab pravaparušeńni było napisana, što jon udzielničaŭ u masavym schodzie, arhanizavanym biez dazvołu rajvykankamu.

«Ja nia toje kab ździviŭsia, — havoryć felčar. — Ale kali zahadali zdymać matuzki, razhubiŭsia krychu. Voś hetaha ja nie čakaŭ. Kažu im, vy mianie choć na pracu adviadzicie, kab ja pieraapranuŭsia. Ja ž u formie «chutkaj» byŭ. Nie paśpieŭ pieraapranucca paśla pracy. Mianie adviali na padstancyju našu. Ja adtul užo paśpieŭ žoncy pazvanić, što «na sutki» zabirajuć»

«Ja spadziavaŭsia, što štraf zapłaču, i ŭsio, — havoryć Pavał. — Kali abviaścili, što siem sutak aryštu, razhubiŭsia. Ja pieršy raz u takoj sytuacyi. Upieršyniu ŭ žyćci. Raniej tolki jak śviedka byŭ. Štrafy mieŭ za kureńnie ŭ padjeździe, za pieravyšeńnie chutkaści. Ale kab tak… Mianie tresła. Pieršyja try dni ŭvohule ciažka było».

Pavał Palejčyk raskazvaje, što častku terminu adsiedzieŭ z sukamernikam — ich trymali pa dvoje ŭ adnoj kamery. Usich «palityčnych», asudžanych u Lidzie (5 čałaviek — RS), trymali asobna.

«Kali ciabie abmiažoŭvajuć va ŭsim, heta realna strašna, — raskazvaje pra svaje ŭražańni ad «sutak» felčar. — Tam niama nijakich umovaŭ, usio drenna. Dzie jasi, tam i hadziš. Spačatku ja z adnym čałaviekam siadzieŭ, potym čatyry dni adzin byŭ u kamery. U apošni dzień mianie pieraviali ŭ inšuju kameru, dzie byŭ asudžany taksama. U kamerach užo viedali, što my «palitźniavolenyja». Paŭłu Ancipkinu dali 15 sutak (jašče adzin zatrymany za ŭdzieł u strymie Cichanoŭskaha — RS), u jaho čaćviora dziaciej, jak jon budzie? Ja b nia viedaju, jak vytrymaŭ, kali b nie maja žonka».

Paśla aryštu Paŭła i inšych udzielnikaŭ lidzkaj sustrečy Cichanoŭskaha ŭ internecie dla aryštavanych litaralna za sutki sabrali niekalki tysiač rubloŭ. Pravaabaroncy nakiravali infarmacyju ab zatrymańni lidzkaha felčara ŭ SAAZ.

«Vielmi ŭdziačny za padtrymku, za listy, — havoryć Pavał. — Čatyry listy atrymaŭ. Usie dziakujuć za praŭdu. Za toje, što nie bajaŭsia raskazać. Ź Miensku, sa Smarhoni, dva ź Lidy. Ja zusim nia viedaju, što adbyvałasia hetyja siem dzion. Tam poŭnaja izalacyja, na vulicu nia vyjści navat. Heta vielmi niapravilna. Siem dzion u kamery — heta vielmi žorstka. Chacia b chvilinu ŭ dzień dali dzieciam pazvanić. Što sa mnoj zaraz budzie, ja nia viedaju. Chaču pabyć ź siamjoj, sa svaimi dziećmi».

Zaŭtra ŭ Paŭła Palejčyka pracoŭny dzień, jon pavinien źjavicca na pracy ŭ ranišniuju źmienu. Felčar havoryć, što pakul nia viedaje, ci čakajuć jaho na «chutkaj».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?