Pavodle apošnich danych pravaabaroncaŭ, u pieryjad z 6 maja ŭ Biełarusi 55 čałaviek atrymali ahułam bolš za 500 sutak aryštu. Jašče bolš za 30 čałaviek byli aštrafavanyja na ahulnuju sumu, jakaja pieravyšaje 13 000 dołaraŭ. I hetyja ličby niekančatkovyja. Sudy nad udzielnikami sustreč z błohieram Siarhiejem Cichanoŭskim ci akcyj pa «karmleńni hałuboŭ» buduć praciahvacca i na najbližejšym tydni. Akramia taho, u rehijonach praciahvajuć składać pratakoły za hetyja akcyi i mirnyja sustrečy.
Brest
U 14.30 u sudzie Leninskaha rajona Bresta raspačniecca sud nad ekaaktyvistkaj, praciŭnicaj akumulatarnaha zavoda Ludmiłaj Karčeŭskaj. Jaje vinavaciać u tym, što jana ŭdzielničała ŭ akcyi pa «karmleńni hałuboŭ» 12 krasavika. Vynik suda — 50 bazavych vieličyń štrafu (1350 rubloŭ).
Taksama musić adbycca praciah suda nad Valeram Faminskim, jaki amal uvieś minuły tydzień pravioŭ u izalatary, choć na «sutki» asudžany nie byŭ. Faminskaha zatrymali 10 maja paśla niadzielnaj akcyi pa «karmleńni hałuboŭ». U aŭtorak jamu prysudzili 30 bazavych vieličyń štrafu i adrazu paśla suda zatrymali znoŭ. Paśla hetaha jon jašče troje sutak prabyŭ u izalatary. U piatnicu paśla skančeńnia 72-hadzinnaha terminu źniavoleńnia aktyvista adpuścili, a sudovaje pasiadžeńnie pieranieśli na nastupny tydzień.
U vyniku Faminskamu dali 30 bazavych vieličyń štrafu (810 rubloŭ) za ŭdzieł u troch akcyjach: 12 krasavika, druhoha i treciaha maja.
Akramia taho, na vychadnych na miažy byŭ zatrymany jašče adzin praciŭnik zavoda AKB, dalnabojnik Pavieł Kinčak. Jak paviedamlaje «Bresckaja hazieta», dniom 16 maja Pavieł viartaŭsia z hruzam z Polščy ŭ Biełaruś. Jaho zatrymali adrazu paśla pierachodu miažy. Jamu inkryminujuć udzieł u niesankcyjanavanaj akcyi pratestu suprać akumulatarnaha zavoda, jakaja prachodziła ŭ Breście 12 krasavika. Da suda jaho źmiaścili ŭ izalatar. Sudzić Paŭła buduć u sudzie Leninskaha rajona 19 maja ŭ 10.30.
Minsk
Jak stała viadoma pravaaboncam, jašče 12 maja sudździa suda Frunzienskaha rajona Dmitryj Łukaševič prysudziŭ ahułam 30 bazavych vieličyń štrafu (810 rubloŭ) zatrymanamu kala handlovaha centra Mile Siarhieju Žuravu. Sudzili Siarhieja pa dvuch administracyjnych pratakołach: za niepadparadkavańnie milicyi (art. 23.34 KaAP) i za ŭdzieł u niesankcyjanavanym masavym mierapryjemstvie (art. 23.34 KaAP). Taksama na 30 bazavych vieličyń sudom Zavodskaha rajona byŭ aštrafavany Jaŭhien Dubovik.
Vilejka
Na 15.00 pryznačany razhlad administracyjnaj spravy miascovaha aktyvista, siabra Partyi BNF Alaksieja Siudaka. Na jaho byli składzieny dva pratakoły za parušeńnie zakanadaŭstva ab masavych mierapryjemstvach (art. 23.34 KaAP). Pra toje, što pasiadžeńnie suda adbudziecca mienavita ŭ hety dzień i hety čas, Alaksiej daviedaŭsia tolki ŭ 10 ranku praz sms-paviedamleńnie, to-bok za piać hadzin da pačatku pasiadžeńnia. Aktyvist nakiravaŭ skarhu ŭ rajonnuju prakuraturu z paznakaj taho, što takoje poźniaje paviedamleńnie ab sudzie nie daje jamu mahčymaści spłanavać svoj čas i, u pieršuju čarhu, znajści sabie abaroncu.
U vyniku Alaksieja Siudaka prysudzili da 10 sutak aryštu. Takoje rašeńnie pryniała sudździa Vilejskaj rajonnaha suda Alena Achmietava.
Navapołack
Na Juliju Šelepień i na jaje muža skłali pratakoły pa č. 1 art. 23.34 KaAP za toje, što 29 krasavika ŭdzielničali ŭ sustrečy z błohieram Siarhiejem Cichanoŭskim, kali toj pryjazdžaŭ u Navapołack. Taksama pratakoł pa art. 23.34 KaAP składzieny na Artura Siniaha za toje, što ŭdzielničaŭ u dvuch mirnych schodach: va ŭžo zhadanaj sustrečy padpisantaŭ «Krainy dla žyćcia» 29 krasavika i ŭ «karmleńni hałuboŭ» treciaha maja.
Homiel
Udzielnika sustrečy salidarnaści z zatrymanym błohieram Cichanoŭskim, jakaja skončyłasia masavymi zatrymańniami, Alaksandra Cibaroŭskaha buduć sudzić. U niadzielu jaho vyklikali ŭ milicyju, dzie paviedamili, što administracyjnaja sprava chutka budzie pieradazienaja ŭ sud. Varta adznačyć, što zatrymanuju ŭ piatnicu ŭdzielnicu toj ža sustrečy Vijaletu Majšuk adpuścili ŭ toj ža dzień biez składańnia pratakoła.
PC «Viasna» stała viadoma, što na błohiera Siarhieja Cichanoŭskaha skłali novy pratakoł za ŭdzieł u niesankcyjanavanym masavym mierapryjemstvie (art. 23.34 KaAP). Paźniej u kancylaryi suda Savieckaha rajona Homiela paćvierdzili TUT.BY, što Cichanoŭski asudžany jašče na 15 sutak. Takim čynam, Cichanoŭski vyjdzie na volu tolki 5 červienia.
Viciebsk
Sud Čyhunačnaha rajona Viciebska 18 maja razhledzieŭ administracyjnuju spravu ŭ dačynieńni viciablanki Darji K., jakuju vinavacili va ŭdziele ŭ niesankcyjanavanym masavym mierapryjemstvie (č. 1 art. 23.34 KaAP) — «karmleńni hałuboŭ» 3 maja. Dziaŭčynu pryznali vinavataj i pakarali štrafam u pamiery 20 bazavych vieličyń (540 rubloŭ).
Spravu razhladała sudździa Alena Cyhankova.
Jak raspaviała «Viciebskaj Viaśnie» Darja, na sudzie ŭ jakaści dokazu jaje vinavataści pakazali videa, na jakim jana moŭčki staić siarod inšych ludziej. U niejki momant da dziaŭčyny padyšoŭ chłopiec, kab paznajomicca, — jany pierakinulisia frazami.
«Nu hladzicie, vy ž razmaŭlali!» — ažyviłasia sudździa… Karaciej, niama słovaŭ! Niejki cyrk učynili! Pravy mnie nijakija nie začytvali i napisali niejkuju achinieju. Ja liču, što na mianie čynicca cisk», — kaža Darja.
Darja paviedamiła taksama, što ŭ dačynieńni da jaje milicyjanty skłali jašče adzin pratakoł za pravaparušeńnie, praduhledžanaje art. 23.34 KaAP, — hetym razam za ŭdzieł u strymie błohiera Cichanoŭskaha 30 krasavika kala piramidy «Marka-sici». Sud adbudziecca 25 maja.
