Rasija adyhryvaje na Blizkim Uschodzie «destruktyŭnuju rolu», tamu jana pavinna «pajści preč» z rehijonu. Takoje mierkavańnie vykazaŭ padčas videakanfierencyi ŭ Instytucie Blizkaha Uschodu ŭ Vašynhtonie pamočnik dziaržsakratara ZŠA Devid Šenkier, piša rbc.ru.
«Na praciahu 45 hadoŭ heta było narožnym kamieniem amierykanskaj palityki — trymać ruskich dalej ad Blizkaha Uschodu. Ciapier jany tam, adyhryvajuć destruktyŭnuju rolu. I my, ščyra kažučy, dumajem, što jany pavinny pajści preč adtul», — skazaŭ pamočnik dziaržsakratara.
Razvažajučy ab «spabornictvie vialikich dziaržaŭ» na Blizkim Uschodzie, majučy na ŭvazie ZŠA, Rasiju i Kitaj, Šenkier zajaviŭ, što Vašynhton nie prymušaje hetyja krainy rabić jaki-niebudź vybar. Pa jaho słovach, ZŠA chočuć, kab hetyja dziaržavy viedali ab mahčymych nastupstvach, jakija mohuć paŭstać u vyniku taho vybaru, jaki jany robiać.
Aproč inšaha, pamočnik dziaržsakratara ZŠA zhadaŭ vykazvańnie Donalda Trampa ab tym, što administracyja papiaredniaha prezidenta Baraka Abamy «vitała prychod ruskich u Siryju» na dapamohu prezidentu krainy Bašaru Asadu. Pavodle jaho słoŭ, papiarednija amierykanskija ŭłady ličyli, što heta «zaciahnie ruskich u dryhvu».
Šenkier pierakanany, što Rasija źmianiła chod vajny ŭ Siryi, adnak u krainie pa-raniejšamu dziejničaje režym Asada. «Ščyra kažučy, ja dumaju, što heta byŭ pravał (administracyi Abamy)», — skazaŭ pamočnik dziaržsakratara.
Na jahonuju dumku, pośpiech u Siryi padšturchnuŭ Rasiju da dziejańniaŭ u Livii, dzie jana ciapier «nie adyhryvaje praduktyŭnaj abo stabilizujučaj roli».
