Siarhiej Kałmykoŭ, archiŭnaje fota.
20-hadovaha Siarhieja Kałmykova vypuścili ź SIZA KDB. Pra heta Svabodzie paviedamiła jahonaja dziaŭčyna Iryna Fiedarenka.
Chłopiec patelefanavaŭ joj z telefona advakata i paviedamiŭ, što jon na voli. Iryna pahavaryła ź Siarhiejem litaralna paru sekundaŭ. Jak jon siabie adčuvaje, jana jašče nia viedaje.
«Jon pazvaniŭ, skazaŭ, što zasumavaŭ i što siońnia pryjedzie», — pierakazała dziaŭčyna.
Siarhiej pryjaždžaje ŭ Horadniu ŭ noč ź piatnicy na subotu (z 5 na 6 červienia).
Siarhiej Kałmykoŭ razam sa svajoj dziaŭčynaj Irynaj Fiedarenkaj byli 29 traŭnia na Savieckaj płoščy ŭ Horadni, dzie adbyvaŭsia zbor podpisaŭ za žonku błohiera Siarhieja Cichanoŭskaha Śviatłanu. Heta była ichnaja pieršaja ŭ žyćci palityčnaja akcyja. Raniej jany nie cikavilisia palitykaj, navat nie chadzili na imprezy kštałtu śviatkavańnia #BNR-100. Pryjšli litaralna za 10 chvilin da taho, jak pačalisia zatrymańni.
Paśla zatrymańnia Kałmykoŭ staŭ padazravanym u kryminalnaj spravie pa č. 3 art. 364 Kryminalnaha kodeksu. Jaho pieraviali ŭ SIZA na Vaładarskaha.
Uviečary kala 19.00 1 červienia ŭ horadzienskaj najmanaj kvatery, dzie žyli Siarhiej i Iryna, adbyŭsia pieratrus. Pryjšli adzin śledčy, dva amapaŭcy, dvoje paniatych nie z susiedziaŭ i «čałaviek, jaki pravodziŭ pieratrus».
Pavodle Iryny, u chacie pieratreśli ŭsie šafy na kuchni, u pakoi, navat śmietnicu. Šukali techniku, dakumenty i ŭlotki, źviazanyja ź Cichanoŭskim. Paśla taho jak dziaŭčyna pačała vieści videazdymku, jana zaŭvažyła, što da rečaŭ stali stavicca bolš aščadna, kłaści ich nazad u šafy. Zabrali staryja knopačnyja telefony i fłešku Iryny. Inšaj techniki doma nie było. U toj ža dzień prajšoŭ pieratrus u Siarhiejevaj babuli ŭ vioscy ŭ Mastoŭskim rajonie, dzie chłopiec prapisany. U žančyny chvoraje serca.
