Pavodle źviestak pres‑słužby Ministerstva achovy zdaroŭja, apieracyi pa transpłantacyi nyrki byli praviedzieny 6 i 7 krasavika ŭ respublikanskim centry urałohii i niefrałohii 2‑j dziciačaj kliničnaj balnicy Minska.
Orhany pierasadzili dvum chłopčykam, 10 i 11 hadoŭ, žycharam Łuninieckaha rajona Bresckaj vobłaści i Hrodzienskaha rajona. Donarami vystupili ich žyvyja svajaki: u adnym vypadku 48‑hadovy baćka, u druhim — 28‑hadovaja maci.
Jak paviedamlaje pres‑słužba, apieracyi pa zabory donarskich nyrak prajšli ŭ respublikanskim centry niefrałohii 4‑j haradskoj balnicy, paśla čaho zakansiervavanyja orhany byli pieraviezieny ŭ 2‑iu dziciačuju balnicu Minska. Transpłantacyi vykanany bryhadaj śpiecyjalistaŭ, jakaja składajecca z transpłantołaha, dziciačych urołahaŭ, aniestezijołahaŭ i niefrołahaŭ.
Stan usich pacyjentaŭ «stabilny i adpaviadaje ciažkaści pieraniesienych apieratyŭnych umiašańniaŭ»,paviedamlaje pres‑słužba. Nyrkavyja transpłantaty pracujuć dobra i vykonvajuć usie svaje funkcyi.
Pavodle apošnich źviestak Ministerstva achovy zdaroŭja, u pierasadcy nyrki ŭ Biełarusi majuć patrebu 24 dziciaci, niekatoryja dzieci znachodziacca ŭ liście čakańnia bolš jak piać hadoŭ.
Tolki šeść biełaruskich dziaciej majuć dziejny transpłantat. Nyrkava‑zamiaščalnuju terapiju atrymlivaje 41 dzicia.
Kolkaść pierasadak nyrak darosłym štohod uzrastaje: kali ŭ 1998 hodzie ŭ krainie było zroblena 17 apieracyj pa pierasadcy nyrki, to ŭ 2008‑m — 70. Z pačatku hetaha hoda ŭžo vykanana 25 transpłantacyj.
