«Adčuvała siabie na niejkim art-chausnym śpiektakli»
Volha Bieraśnieva žyvie ŭ vioscy Vałožynskaha rajona. Jana sprabavała patrapić u kamisiju Rakaŭskaha vybarčaha ŭčastka №19. Paŭdzielničać u hetaj avantury vyrašyła spantanna. Za sutki sabrała nieabchodnyja 10 podpisaŭ ad adnaviaskoŭcaŭ — na paviedamleńnie ŭ miascovym čacie ludzi sami adhuknulisia.
Fota z Facebook
Kali Volha paviezła dakumienty ŭ Vałožyn, jaje zajava była 346-j.
«346 zajaŭ na 26 učastkaŭ. Ujavicie! Pa 30 zajaŭ na dzień niasuć, — niezadavolena kinuła žančyna z rajvykankama. — Zarehistruju, a vykankam niachaj vyrašaje», — zhadvaje Volha.
Čynoŭniki ŭ vyniku joj admovili. 9 z 10 čałaviek u kamisii prahałasavali suprać.
«Pradkazalna, ale asadačak zastaŭsia. Niejak ciažka, tužliva, prykra ŭnutry, — dzielicca jana. — Kali koratka: im nie patrebny sumlennyja ludzi ŭ kamisii. Kankretna pa majoj zajavie zrabili zaŭvahu, što ja prapisana nie pa adrasie pražyvańnia (a heta nie abaviazkovaja ŭmova). Ja pražyvaju akurat u Vałožynskim rajonie, i pałova vykankama heta viedaje: kolki my ź imi nakont elektryčnaści našaj pierapisvalisia i sustrakalisia».
Z 19 pretendentaŭ zaćvierdzili 15. Što dziŭna — pra ludziej, jakija patrapili ŭ vyniku ŭ kamisiju, vykazvalisia paśla ich abrańnia, a nie pierad. Heta byli pradstaŭniki «Biełaj Rusi», Biełaruskaha sajuza žančyn.
«Vystupali kandova: charaktaryzujem jak dobrasumlennaha rabotnika, sacyjalna aktyŭnaha, adkaznaha čałavieka, jaki karystajecca aŭtarytetam u kalektyvie… Ja adčuvała siabie na niejkim art-chausnym śpiektakli, hladzieła na ludziej i nie razumieła, što adbyvajecca.
Abo jany drenna hrali, abo prosta ja nie zrazumieła zadumu. Bolš nie chaču ŭdzielničać u padobnym. Vielmi vymatvaje», — emacyjna padzialiłasia Volha.
«Členy kamisii staralisia nie padymać vačej»
Arhanizatarka mierapryjemstvaŭ Julija Kaleśnikava padavała dakumienty ŭ Baraŭlanski ŭčastak №1.
Fota z Facebook
«Ja sačyła za chodam padačy dakumientaŭ na płatformie «Sumlennyja vybary». Sens byŭ u tym, kab padacca jak maha šyrej pa Biełarusi. Na maim učastku — u Kopiščy — užo byli zajaŭki ad piaci čałaviek. Tamu ja pahladzieła, kudy jašče nie padavalisia dobraachvotniki, i vybrała hety rajon», — kaža dziaŭčyna.
Podpisy jana sabrała ŭsiaho za 40 chvilin — praktyčna ŭsie, kaho jana sustreła na ŭčastku, pahadzilisia patrymać jaje vyłučeńnie.
Za pasiadžeńniem u Minskim rajvykankamie jana sačyła anłajn. Razhlad zajavak prachodziŭ chutka.
«Absalutna nijakoj charaktarystyki ludziam nie davali. Prosta moŭčki padymali ruku «za» ci «suprać». Nijakich kamientaroŭ», — apisvaje Julija. Jaje padtrymaŭ tolki adzin člen kamisii.
I znoŭ siarod kandydatur — vychadcy z «Biełaj Rusi», Biełaruskaha sajuza žančyn i BRSM.
Byŭ šaniec dabracca ŭ adnoj dziaŭčyny-samavyłučenki (jana atrymała paroŭnu hałasoŭ «za» i «suprać»), ale, jak tolki vyśvietliłasia, što achvotnych pierabor, jaje adrazu vykinuli.
«Pasiadžeńnie i praca kamisii vyklikajuć złość i rasčaravańnie, pačynajučy ad ŭzroŭniu arhanizacyi (internet-złučeńnie hlučyć i zavisaje) i zakančvajučy členami kamisii.
Adčuvańnie poŭnaj zakrytaści, što ŭsio vyrašana zahadzia. Ludzi staralisia nie padymać vačej — siadzieli i cicha padymali ruki, byccam vykonvajučy dziaržzamovu»,
— acharaktaryzała dziaŭčyna toje pasiadžeńnie.
Julija nie zdajecca: źbirajecca pajści naziralnikam u hłybinku.
«Mnie plunuli ŭ dušu — paśla ŭsiaho tak kinuć!»
Adrazu piać alternatyŭnych kandydataŭ padavalisia na ŭčastak u ahraharadku Słabada Smalavickaha rajona. Nikoha ź ich nie ŭziali. Adzin z tych samavyłučencaŭ — žurnalist na piensii Leanid Klimanski. Za svaju karjeru jon paśpieŭ papracavać u «Sielskaj haziecie», «SB», BiełTA (namieśnikam hałoŭreda fotachroniki), kamiercyjnym dyrektaram na STB. Papiaredžvaje: za Łukašenku nikoli nie hałasavaŭ.
Fota z Facebook
«Pasłužny śpis zasłuhoŭvaje ŭvahi. Ja byŭ upeŭnieny, što paśla pracy ŭ takich strukturach u mianie šancy pavyšajucca. Byŭ spakojny», — zaŭvažaje Leanid.
Pa jaho kandydatury prahałasavali takim čynam: dva «za», dva «suprać» i šeść «ustrymalisia».
Leanid raskazvaje: alternatyŭnyja kandydaty ŭ kamisiju byli jak na padbor. Adzin kiruje budaŭničaj firmaj, inšy pracuje ŭ PVT… Nikoha nie zaćvierdzili (pryčyny admovy, kaniešnie, nie ahučvali). Ličyć hałasy na vybarach buduć kiroŭca kałhasa, žyviołavod, prybiralščyca, nastaŭnicy, jakija byli ŭ składzie kamisii na papiarednich vybarach.
Čamu? Bo «idejnyja, nadziejnyja, karystajucca pavahaj siarod svaich supracoŭnikaŭ i žycharoŭ pasiołka, znajomyja z vybarčym kodeksam».
Leanid paśla pasiadžeńnia raźjušany.
«Mnie plunuli ŭ dušu! Nikoli nie dumaŭ, što paśla pracy ŭ takich arhanizacyjach mianie mohuć tak kinuć!
My ŭpiacioch chočam padać zajavu ŭ sud. Ja sam siabie chaču apraŭdać, što ja zrabiŭ usio mahčymaje. Sud, viadoma, nie vyjhrajem, ale choć kamisiju paciahajem».
