Jury Ŭłasaŭ, davieranaja asoba Śviatłany Cichanoŭskaj, padaŭ u rajvykankamy Homielskaj vobłaści paviedamleńni ab praviadzieńni ahitacyjnych pikietaŭ. Jon atrymaŭ adkaz, što pravodzić ahitacyju možna tolki ranicaj — ad 8 da 12 hadziny, piša Radyjo Svaboda.
«Navat u vychodny dzień! Chto pryjdzie na pikiet u budzionny ci vychodny dzień a 8-j ranicy? U vykankamach tłumačać, što inšy, paźniejšy čas užo zaniaty davieranaj asobaj inšaha kandydata, Alaksandra Łukašenki. Heta hieneralny dyrektar AAT «Spartak» Aleh Žydkoŭ», — skazaŭ Svabodzie Jury Ŭłasaŭ.
Z takoj sytuacyjaj jon sutyknuŭsia ŭ Žłobinie i Dobrušy.
«Naohuł, ahitacyjny pikiet možna stavić u dazvolenym miescy pa pryncypie apaviaščeńnia. My apaviaścili vykankamy i nibyta možam pravodzić pikiety. Ale namieśnik staršyni Dobruskaha rajvykankamu Rusłan Sikorski nam adkazaŭ, što kali my budziem pravodzić pikiet paźniej za 12 hadzinu, to heta budzie niesankcyjanavanaje mierapryjemstva», — kaža Ŭłasaŭ.
U Homli jon taksama padaŭ paviedamleńni ŭ administracyi rajonaŭ.
«Vusna nam adkazali ŭ administracyjach, što pikiety dazvolać tolki z 8 da 12. Aficyjnuju papierku abiacali dasłać, ale ŭsio zrazumieła i tak», — dadaŭ Jury Ŭłasaŭ.
Pakul u Homielskaj vobłaści ŭ Cichanoŭskaj uzhodnieny adzin pikiet — u Buda-Kašalovie, a 21-j hadzinie na školnym stadyjonie. «Dazvolili tolki adnu hadzinu, z 21.00 da 22.00», — udakładniŭ Ułasaŭ.
Z padobnaj sytuacyjaj sutyknulisia i davieranyja asoby Andreja Dźmitryjeva. Rečyckija i homielskija ŭłady dazvolili im pravodzić pikiety tolki ranicaj.
Doŭhaterminovy naziralnik na prezydenckich vybarach Leanid Sudalenka nazvaŭ prapanovy čynoŭnikaŭ ahitavać tolki ranicaj «svavolstvam».
«Tak, na adnoj placoŭcy nielha pravodzić adnačasova dva masavyja mierapryjemstvy — pavodle zakonu ab masavych mierapryjemstvach. Ale vybarčaj kampanii heta nia tyčycca. U vybarčaj kampanii pytańni rehulujucca Kanstytucyjaj, Vybarčym kodeksam i pastanovami CVK. Nidzie — ni ŭ Vybarčym kodeksie, ni ŭ pastanovach CVK — niama takoj normy, što vykankamy vyznačajuć čas dla ahitacyi. Davieranaja asoba padała paviedamleńnie na dazvolenaje miesca — i musić iści ahitavać. Treba abskardžvać takija rašeńni vykankamaŭ», — prakamentavaŭ sytuacyju Sudalenka.
Jon nia bačyć parušeńnia zakonu, kali na adnoj placoŭcy buduć ahitavać za dvuch kandydataŭ. «Kali davieranyja asoby damoviacca. Pavodle vybarčaha zakanadaŭstva, kali ŭ vykankam raniej pastupiła zajaŭka ad inšaha kandydata i pamiž kandydatami niama damoŭlenaści, to miascovy orhan moža prapanavać inšy čas», — dadaŭ naziralnik.
«Raniej vykankamy vyznačali miescy dla ahitacyi, dzie nielha jaje pravodzić. Sioleta jany vyznačyli miescy, dzie možna ahitavać — u Homli heta try addalenyja ad centru placoŭki. Pryčym u Centralnym rajonie ŭvohule ahitavać nielha», — nahadaŭ pravaabaronca.
