Triplook
U vjetnamskim Dananhu — bujnym horadzie i adnym z hałoŭnych kurortaŭ krainy — zafiksavali łakalnuju ŭspyšku karanavirusa. Havorka idzie ab raspaŭsiudzie novaha, bolš zaraznaha typu karanavirusa SARS-COV-2, havorycca ŭ paviedamleńni na ŭradavym partale.
U suviazi z raspaŭsiudžvańniem karanavirusa z Dananha było vyrašana evakujavać turystaŭ, piša RBK. Usiaho evakuacyi padlahajuć kala 80 tys. čałaviek. Ujezd u Vjetnam zamiežnym turystaŭ zabaronieny ź viasny, tamu ŭ asnoŭnym u horadzie ciapier znachodziacca turysty ź inšych rehijonaŭ Vjetnama. Ich buduć vyvozić u rodnyja rehijony śpiecyjalnymi avijarejsami, i paśla prybyćcia jany pavinny prajści dvuchtydniovy karancin i paviedamić pra stan svajho zdaroŭja ŭładam.
Za apošnija sutki ŭ Dananhu i jaho vakolicach vyjavili čatyry vypadki zaražeńnia karanavirusam. Heta dosyć vialikaja kolkaść dla krainy, u jakoj z pačatku epidemii, pavodle źviestak Univiersiteta Džonsa Chopkinsa, było vyjaŭlena tolki 420 vypadkaŭ zaražeńnia. Jak adznačaje The Guardian, uspyška ŭ Dananhu — heta pieršy zafiksavany vypadak raspaŭsiudžvańnia virusa ŭ krainie z krasavika.
Z čatyroch zaražanych dvoje znachodziacca ŭ ciažkim stanie, i im patrabujucca aparaty štučnaj vientylacyi lohkich.
U Dananhu znoŭ uvodzicca režym sacyjalnaha dystancyjavańnia. U horadzie admianiajucca ŭsie spartyŭnyja, kulturnyja i relihijnyja mierapryjemstvy. Žycharam horada zabaroniena źbiracca ŭ hramadskich miescach hrupami bolš za 30 čałaviek.
