28 lipienia ŭ rehijonach Biełarusi adbylisia novyja zatrymańni, na aktyvistaŭ praciahvajuć składać pratakoły, a ŭ bresckaha aktyvista Andreja Šarendy prachodzić pieratrus, paviedamlajuć pravaabaroncy.
Minsk
Kala KDB u Minsku zatrymali bolš za 10 žurnalistaŭ i ludziej, jakija stajali ŭ čarzie.
Kala budynu KDB u Minsku zatrymanyja žurnalisty i hramadzianie, jakija pryjšli, kab stać paručycielami dla źmieny miery strymańnia dla Viktara Babaryki.
Masty
U Mastach zatrymali Ramana Rabcova, jaki raspaŭsiudžvaŭ vybarčyja materyjały ŭ pryvatnym siektary, raskidvaŭ ich u paštovyja skrynki. Jaho zatrymała milicyja, zabrali telefon i zavieźli ŭ RUUS składać pratakoł administracyjnaha pravaparušeńnia za raspaŭsiud rekłamnaj pradukcyi ŭ niedazvolenych miescach. Paźniej milicyja jaho adpuściła, uziaŭšy tłumačeńni. Ale telefon nie addali.
Orša
U Oršy zatrymali Illu Cichanava. U hety dzień jon na svajoj mašynie musiŭ vieźci davieranych asob Śviatłany Cichanoŭskaj na pikiet u Tałačyn. Pa papiaredniaj infarmacyi na jaho składzieny pratakoł pa art. 23.34 KaAP (udzieł u niesankcyjanavanym masavym mierapryjemstvie). Sud chutčej za ŭsio adbudziecca zaŭtra.
Śvietłahorsk
U Śvietłahorsku paśla pikieta Śviatłany Cichanoŭskaj miascovaha aktyvista Valeryja Smalančuka vyklikajuć u RAUS na 30 lipienia, kab skłaści pratakoł pa art. 23.34 KaAP. Vierahodna heta źviazana z tym, što padčas pikietu jon zaklikaŭ ludziej prychodzić na płošču ŭ Śvietłahorsku pa niadzielach i padtrymlivać tym samym ekaaktyvistaŭ.
Hrodna
Siońnia skončyŭsia 15-sutkavy termin aryštu žychara Lidy Dzianisa Rudzieviča, ale na volu jaho nie vypuścili. Na jaho skłali novy administracyjny pratakoł pa 23.34 KaAP (za što mienavita - pakul nieviadoma) i buduć zaŭtra sudzić u Lidzie.
Brest
Telehram-kanał hramadzianskaj kampanii «Jeŭrapiejskaja Biełaruś» paviedamiŭ, što pa stanie na 16.30 adbyvajecca pieratrus u kvatery ich bresckaha kaardynatara Andreja Šarendy, dzie jon pražyvaje z žonkaj i dvuma dziećmi.
Pieratrus pravodziać supracoŭniki Maskoŭskaha RUUS Bieraścia. Pastanova padpisanaja starejšym učastkovym inśpiektaram milicyi Daŭžaniukom.
