Paśla dvuch miesiacaŭ źniavoleńnia ŭviečary 29 lipienia ź SIZA-1 na vuł. Vaładarskaha ŭ Minsku vypuścili fihuranta spravy pavodle č. 1 art. 342 KK RB, palitviaźnia Viarhilija Ušaka. Pra heta paviedamiła spring96.org jaho niaviesta, jakaja sustreła jaho a 20-j viečara kala SIZA.
Viarhilij Ušak paśla vyzvaleńnia. Fota dasłała spring96.org jaho niaviesta Nadzieja
Ušak zastajecca padazravanym pa kryminalnaj spravie. Jamu abranaja miera strymańnia ŭ vyhladzie padpiski ab niavyjeździe.
Viarhilij Ušak byŭ zatrymany 29 maja ŭ Hrodnie padčas vybarčaha pikieta pa zbory podpisaŭ u padtrymku vyłučeńnia kandydatam ŭ prezidenty Śviatłany Cichanoŭskaj. Tady supracoŭnikami milicyi byŭ zatrymany i kiraŭnik inicyjatyŭnaj hrupy Siarhiej Cichanoŭski, i jašče jak minimum 15 hramadzian, jakija brali ŭdzieł u tym pikiecie.
Palitviaźni-2020. Chto taki apieratar Viarhilij Ušak, jaki staŭ vypadkovaj achviaraj pravakacyi ŭ Hrodnie?
8 červienia siemiarym udzielnikam mierapryjemstva, u tym liku Viarhiliju Ušaku, było vystaŭlena abvinavačvańnie ŭ arhanizacyi hrupavych dziejańniaŭ, jakija hruba parušajuć hramadski paradak i źviazanyja ź vidavočnym niepadparadkavańniem zakonnym patrabavańniam pradstaŭnikoŭ ułady, i ŭ aktyŭnym udziele ŭ takich dziejańniach (Častka 1 artykuła 342 KK Respubliki Biełaruś).
9 červienia pravaabarončaja supolnaść Biełarusi pryznała jaho palityčnym źniavolenym i zapatrabavała nieadkładnaha vyzvaleńnia. Paźniej mižnarodnaja pravaabarončaja arhanizacyja Amnesty International pryznała biełaruskich palitviaźniaŭ viaźniami sumleńnia.
