Žurnalistaŭ Radyjo Svaboda vyklikali na dopyty ŭ Śledčy kamitet u miežach kryminalnaj spravy, zaviedzienaj pavodle padziej 14 lipienia ŭ Miensku.
Aperatar ź biełaruskaha biuro Svabody Andrej Rabčyk byŭ dapytany siońnia, 3 žniŭnia. Vyklikany na dopyt taksama karespandent Aleś Pilecki.
Andrej Rabčyk raskazaŭ, što cikaviła śledčaha padčas dopytu.
«Apytvali jak śviedku, pad pratakoł. Asabliva pytalisia pra padziei, jakija adbylisia kala płoščy Pieramohi, što bačyŭ, jak tam akazaŭsia. Uvohule, skłałasia ŭražańnie, što ich cikaviać nia stolki abstaviny padziei, kolki šukajuć mierkavanych arhanizataraŭ, chacia, jak mnie padajecca, tam usio ŭźnikła stychijna», — raskazaŭ paśla dopytu Andrej Rabčyk.
14 lipienia stała viadoma, što Centravybarkam nie zarehistravaŭ kandydatami na prezydenta byłoha staršyniu praŭleńnia «Biełhazprambanku» Viktara Babaryku i byłoha kiraŭnika Parku vysokich technalohij Valera Capkału.
Prychilniki hetych pretendentaŭ u kandydaty na prezydenta aburylisia rašeńniem Centravybarkamu, šmat ludziej na znak pratestu vyjšli na vulicy ŭ centry horadu. U Miensku najbolš pratestoŭcaŭ akazałasia na vulicy Niamizie i na praspekcie Niezaležnaści, dzie supracoŭniki AMAPu i milicyjanty ŭ cyvilnym pačali zatrymańni. Tam ža adbylisia sutyčki pratestoŭcaŭ z pravaachoŭnikami, u jakich, pavodle MUS, paciarpieli 4 milicyjanty.
Pratesty adbylisia taksama ŭ inšych miescach Biełarusi. Usiaho pa krainie, pavodle pravaabaroncaŭ, było zatrymana bolš za 300 čałaviek. Pavodle «Viasny», u toj viečar pravaachoŭniki zatrymali 14 žurnalistaŭ, u tym liku karespandentaŭ Radyjo Svaboda, Eŭraradyjo, partału tut.by, «Biełsatu» dy inšych medyja. Paźniej zatrymanych supracoŭnikaŭ ŚMI vypuścili.
MUS paviedamiŭ pra pačatak kryminalnaj spravy pavodle artykuła ab užyvańni hvałtu suprać supracoŭnikaŭ pravaachoŭnych orhanaŭ.
«U miežach spravy viaducca śledčyja dziejańni», — hetak u haradzkoj upravie SK prakamentavali dopyt aperatara Svabody Andreja Rabčyka.
Na čaćvier, 6 žniŭnia, da śledčych na dopyt vyklikany karespandent Eŭraradyjo.
