«Ja — sałdat, jaki baraniŭ krainu, razburanuju NATA, Vatykanam i mižnarodnaj mafijaj», — zajaviŭ u Haazie sierbski hienierał Ratka Mładzič, asudžany na pažyćciovaje źniavoleńnie za masavaje źniščeńnie mirnaha nasielnictva Bośnii. U sieradu zaviaršylisia słuchańni pa jaho apielacyi, piša bbc.com.
«Ja prafiesijny vajskoviec, i ja słužyŭ i ŭ mirny, i ŭ vajenny čas svajoj krainie, razburanaj NATA […] Ja nie śviaty, ja prosty čałaviek, ja kazaŭ heta šmat razoŭ — viera prymusiła mianie ŭstać na abaronu svajoj krainy, jakaja razburanaja namahańniami NATA pry dapamozie Vatykana i mižnarodnaj mafii», — skazaŭ 78-hadovy Ratka Mładzič u karotkaj i sumburnaj pramovie paśla zakančeńnia dvuchdzionnych słuchańniaŭ pa dźviuch apielacyjach na jaho prysud.
Były kamandujučy armijaj baśnijskich sierbaŭ Mładzič abvinavaciŭ baśnijskich musulman u tym, što jany nie vykonvali pahadnieńni ab demilitaryzavanych zonach, u lik jakich, pa słovach Mładziča, uvachodzili i Srebranica, i Sarajeva — harady, za zabojstva mirnych žycharoŭ jakich jon asudžany.
Advakat Mładziča davodziŭ sudździam, što sałdaty hienierała Mładziča zabivali mirnych žycharoŭ bieź jaho viedama.
«Ciažka sabie ŭjavić bolš niedvuchsensoŭny vyraz hienacydalnych namieraŭ, čym zajavu Mładziča: «Moj kłopat - kab jany całkam źnikli». Kali my aceńvajem jaho słovy razam ź jaho dziejańniami […] my možam zrabić tolki adnu vysnovu: Mładzič mieŭ namier fizična źniščyć baśnijskich musulman va ŭsich hetych municypalitetach», — skazała prakuror, nazvaŭšy Mładziča «adnym z hałoŭnych i najhoršych złačyncaŭ» siarod tych, kaho sudzili ŭ Haazie.
Paśla vajny ŭ Bośnii Ratka Mładzič doŭha chavaŭsia ŭ Sierbii, ale ŭ 2011 hodzie, paśla źviaržeńnia Słabadana Miłošaviča, byŭ aryštavany i vydadzieny ŭ Haahu. Sud nad im ciahnuŭsia piać hadoŭ.
