Pravaabaroncam paviedamili pra zatrymańnie ranicaj 28 žniŭnia junaj dziaŭčyny Alaksandry Škaruba. Kala 11 ranicy da jaje dadomu zajavilisia supracoŭniki Leninskaha RAUS i zapatrabavali prajechać ź imi.
U milicyi studentcy BRU pradjavili pretenzii za ŭdzieł u mirnaj akcyi — jaje nibyta vyličyli pa videa, na jakim było vidać, što ŭ jaje byŭ ściah.
Adrazu paśla hetaha na adras Škaruba palacieli abrazy i pahrozy. Jaje nazyvali «ŭtrymankaj» i abiacali, što buduć spryjać jaje vyletu z univiersiteta.
Taksama jany patrabavali infarmacyju pra akcyi pratestu ŭ Mahilovie i ich udzielnikach. U advarotnym vypadku dziaŭčynie pahražali spačatku štrafami abo aryštam na niekalki sutak, a paśla — turmoj. Ad Škaruba zapatrabavali, kab jana padpisała papieru z abaviazacielstvam nie ŭdzielničać u mirnych akcyjach. Akramia taho, joj vypisali pozvu ŭ Leninski RAUS na 29 žniŭnia, kudy pavinien pryjści prakuror.
Svajaki Alaksandry majuć namier abskardzić dziejańni milicyi ŭ prakuratury.
28 žniŭnia pravaabaroncam paviedamili pra źniknieńnie Alaksandra Ivańkova.
Jon byŭ zatrymany nieviadomymi jašče 25 žniŭnia pryblizna 16 hadzin na moście pa praśpiekcie Dzimitrava. Pavodle jaho blizkich, u jaho pry sabie byŭ ściah.
Na praciahu troch sutak supracoŭniki milicyi admaŭlali, što Ivańkoŭ znachodzicca ŭ ich. U Leninskim RAUS śćviardžali, što jon utrymlivajecca ŭ IČU, adnak u izalatary zajaŭlali, što ŭ ich niama takoha čałavieka.
Tolki paśla publikacyi infarmacyi pra źniknieńnie Alaksandra Ivańkova ŭ internecie i pačatku masavaha telefanavańnia ŭ Leninski RAUS, mužčyna niečakana «znajšoŭsia» ŭ izalatary časovaha ŭtrymańnia.
Pa słovach dziažurnaha, Ivańkoŭ aryštavany na piać sutak. Artykuł, pa jakim sudzili Ivańkova, nazvać admovilisia.
