Fota Nadziei Bužan
Asablivaść biełaruskaj aksamitnaj revalucyi-2020: budzieš ranicaj jechać pa praśpiekcie Niezaležnaści — ni za što nie pavieryš, što praz paru hadzin uvieś centr budzie zabłakavany sotniami tysiač demanstrantaŭ. Voś i siońnia a 13-j byŭ idealny łukašenkaŭski paradak: turnikiety, milicyjanty, drobny doždžyk.
Ź niezvyčajnaha była tolki zdymačnaja hrupa «Rašy tudej», jakaja mantavała na rahu praśpiekta i Vaładarskaha štatyŭ sa śviatłom i vystaŭlała kamieru na bałkonie. Takaja padrychtoŭka śviedčyła, što prapahandysty dakładna viedali: voś mienavita ŭ hetym miescy adbudziecca štości «smačnaje» dla ich.
I dakładna: kali pieršyja pratestoŭcy sa ściahami kala hatela «Minsk» upiorlisia ŭ zaharodku z turnikietaŭ, licha padjechali aŭtazaki, vyskačyŭ AMAP i pachapaŭ ludziej. Rešta musiła adbiehčysia da kinateatra «Centralny». Kłasnaja karcinka dla dziaržprapahandy: mizerny pratest, rašučyja dziejańni ŭłady — pakiń nadzieju, tak skazać.
Cikava, ci zdymała «Raša tudej», što było paśla?
Jak aŭtazaki raźviarnulisia i stali kala procilehłaha tratuara. Jak znoŭ vyskačyŭ AMAP. Jak natoŭp u niekalki socień ludziej rušyŭ da aŭtazakaŭ praz prajezdžuju častku i zahnaŭ amapaŭcaŭ nazad. Jak pa praśpiekcie na ludziej puścili sistemu «Rubiež» — mietaličnyja sietki na džypach, kab ciaśnić natoŭp. Pierad vybarami jaje demanstravali Łukašenku na palihonie, a na praśpiekcie Niezaležnaści, suprać mirnaj akcyi, vyprabavali ŭpieršyniu. Jak para socień demanstrantaŭ apynulisia ŭ pastcy miž «Rubiažom» i łancuhami siłavikoŭ kala HUMa. Jak ludzi dvojčy praryvalisia praz łancuh sałdataŭ da Kastryčnickaj. Jak paśla pačali kłaścisia i siadać na ziamlu pierad «Rubiažom». Jak amapaŭcy pačali vychoplivać z natoŭpu pa adnym čałavieku. Jak paviali pad ruki vieterana-lotčyka, što pryjšoŭ na mitynh sa ściaham vajskova-pavietranych siłaŭ. Jak «Rubiež» pajechaŭ napierad, adciaśniajučy ludziej svaimi mietaličnymi sietkami…
Ci zdymała «Raša tudej» dalej?
200-tysiačny natoŭp, što ŭzdymaŭsia pa praśpiekcie ad płoščy Pieramohi, dychnuŭ u patylicu siłavikam. I jak tyja rasstupilisia, vypuściŭšy ludziej z pastki.
Paśla hetaha «Rubiež», što zastyŭ na linii HUMa, pieratvaryŭsia ŭ fon dla sełfi. Bo nijakimi chvalonymi śpiecsrodkami niemahčyma razahnać mirny pratest, jaki vymiarajecca navat nie tysiačami, a kiłamietrami ludziej. Siłaviki heta razumiejuć. Ci zrazumieje zamoŭca «Rašy tudej»?
