Pavieł Łučynovič. Fota Siarhieja Hapona, kp.by
Siońnia sud Zavodskaha rajona abviaściŭ prysud pa spravie byłoha hałoŭnaha architektara Minska Paŭła Łučynoviča. Eks-čynoŭnika pryznali vinavatym u atrymańni chabaru i pryznačyli pakarańnie ŭ vyhladzie 1,5 hoda kałonii. Ale hod eks-čynoŭniku było vyrašana skinuć pa amnistyi da 75-hodździa Pieramohi. Z ulikam ža praviedzienaha ŭ SIZA času, sud pryznaŭ, što Łučynovič takim čynam adbyŭ usio pakarańnie. A heta značyć, ź siońniašniaha dnia jon na svabodzie, piša Tut.by.
Paŭła Łučynoviča zatrymali ŭ sakaviku 2019 hoda pa padazreńni ŭ atrymańni chabaru ad ipešnicy Nony Hryšynaj, a ŭ vieraśni taho ž hoda jaho dastavili ź SIZA na Vaładarskaha ŭ balnicu ź infiekcyjnym zachvorvańniem i paraličam nižniaj častki cieła. Jon pieranios apieracyju i znachodziŭsia na lačeńni. Tamu sud nad im pieranieśli. Nonu Hryšynu ž pryznali vinavataj u dačy chabaru Łučynoviču i asudzili na dva hady, ale nieŭzabavie jana vyjšła na volu pa amnistyi.
Sudovy ža praces nad Paŭłam Łučynovičam pačaŭsia niekalki miesiacaŭ tamu, ale pra jaho nie abviaščałasia ŭ ŚMI z-za epidemijałahičnaha stanovišča, paviedamili TUT.BY u sudzie.
Jak stała viadoma partału, prakuror zapatrabavaŭ dla eks-čynoŭnika pakarańnie ŭ vyhladzie troch hadoŭ pazbaŭleńnia voli pa artykule 430 (atrymańnie chabaru) z užyvańniem častcy 2 artykuła 92 Kryminalnaha kodeksu - heta značyć z vyzvaleńniem ad pakarańnia abo zamienaj pakarańnia bolš miakkim pa zachvorvańniu. Vinu Pavieł Łučynovič nie pryznaŭ.
U vyniku sud Zavodskaha rajona pryznaŭ Łučynoviča vinavatym u atrymańni chabaru.
