Pavodle ŭdakładnienych źviestak, u Minsku zatrymana kala 30 udzielnikaŭ akcyi z nahody 10-hodździa źniknieńnia Juryja Zacharanki, što prajšła viečaram 7 maja na Kastryčnickaj płoščy.
«Zatrymanyja byli dastaŭleny ŭ Centralny RUUS. Potym ich adpuskali biez składańnia pratakołaŭ», — paviedamiła BiełaPAN namieśnik staršyni zarehistravanaj u Čechii arhanizacyi «Małady front» Nasta Pałažanka. Pavodle jaje słoŭ, niekatoryja aktyvisty zhadžajucca padpisać papieru, dzie ich papiaredžvajuć ab niezakonnaści ŭdziełu ŭ niesankcyjanavanych akcyjach. Tyja, kaho niama ŭ daktyłaskapičnaj bazie MUS, robiać adbitki palcaŭ.
Pierad pačatkam akcyi byŭ zatrymany staršynia Abjadnanaj hramadzianskaj partyi Anatol Labiedźka. Svajo zatrymańnie jon nazvaŭ «adkrytaj palityčnaj šyzafrenijaj».
U akcyi, jakaja prachodziła na Kastryčnickaj płoščy z 18.00 da 18.35, udzielničała kala 150 čałaviek, u tym liku apazicyjnyja palityki Mikałaj Statkievič, Vincuk Viačorka, Andrej Sańnikaŭ, Dźmitryj Bandarenka, Artur Fińkievič, Siarhiej Skrabiec.
Akcyja była pryśviečanaja pamiaci byłoha ministra ŭnutranych spraŭ Juryja Zacharanki, jaki prapaŭ bieź viestak 7 maja 1999 hoda. Jaje ŭdzielniki stali łancužkom uzdoŭž praśpiekta Niezaležnaści ź bieł‑čyrvona‑biełymi ściahami, partretami Ju.Zacharanki i zatrymanaha pradprymalnika z Vaŭkavyska Mikałaja Aŭtuchoviča, jaki znachodzicca ŭ śledčym izalatary pa vulicy Vaładarskaha i abviaściŭ haładoŭku pratestu. Udzielniki akcyi skandziravali łozunhi «Žyvie Biełaruś!», «Svaboda!», «Svabodu palitviaźniam!».
Nasuprać ich, taksama łancuhom, stali bajcy milicejskaha śpiecnaza. Jany nie davali ŭdzielnikam akcyi nabližacca da prydarožnaj častki.
