Najlepšy biełaruski šachmatyst 26-hadovy hrosmajstar Uładzisłaŭ Kavaloŭ padpisaŭ adkryty list spartoŭcaŭ suprać hvałtu i za sumlennyja vybary. Taksama jon, jak pieradaje «Trybuna», admoviŭsia padpisvać dadatkovaje pahadnieńnie da kantraktu z RCAP pa šaškach i šachmatach, za što byŭ zvolnieny z nacyjanalnaj zbornaj, i źniaŭsia z čempijanatu krainy.
«Ja zaŭsiody byŭ apalityčny. Dy i ciapier ničoha palityčnaha, pa sutnaści spravy, niama. Heta prosta reakcyja narmalnaha čałavieka na toje, što adbyvajecca vakoł. Heta pieršyja vybary, u jakich ja prymaŭ udzieł. Na žal, prajšli jany ź vialikimi parušeńniami. Pra heta śviedčyć mnostva faktaŭ.
Ale toje, što adbyłosia paśla ich, — narmalnamu čałavieku ciažka zrazumieć. Vielmi ciažka było ŭśviedamlać, što ŭ našaj krainie da mirnych ludziej užyvajecca taki hvałt. Sam ja nie ŭdzielničaŭ u mitynhach. Čuŭ apoviedy vidavočcaŭ i hladzieŭ infarmacyju ŭ internecie. Ja nikoli nie vykazvaŭ svajho mierkavańnia publična. Spadziavaŭsia, što chutka ŭsio stanie na svaje miescy, ale hvałt praciahvajecca.
Pryčym dajšło da taho, što padniali ruku na starych. Mianie hłyboka ŭzrušyli kadry, na jakich ludzi ŭ čornym raspylajuć haz babulam u vočy», — skazaŭ Kavaloŭ.
