Pajezdku ŭ Salihorsk Łukašenka napoŭnicu vykarystaŭ dziela pijaraŭskich metaŭ. Adpracavany ŭsie adčuvalnyja pytańni: ad vizitu ŭ Vatykan da «dezy» ab prodažy «Iskanderaŭ» Iranu dy Siryi.
U šachciorskim horadzie Łukašenka vykazvaŭsia pa-narodnamu sakavita. Śpiekulacyi maskoŭskich dziejačaŭ na jahonaj idei fiks — sastykavać u Biełarusi pantyfika z patryjarcham — aficyjny kiraŭnik adkamientavaŭ tak: «Jakaja tut palityka? U niekaha ŭ Rasii niešta śviarbić, jak kazaŭ Čarnamyrdzin. Dyk čuchajcie ŭ inšym miescy!».
(I tut ža pierajšoŭ na palityku, pryznaŭšysia, što papa dy kardynał Biertone spryjajuć naładžvańniu dyjałohu z Zachadam.)
Uvohule Rasii trapiła na arechi. Na jaje čarhovy raz uskładziena vina za pravał sajuznaha prajekta.
Takim svojeasablivym mietadam ad zvarotnaha zavualavana apraŭdvajecca ciapierašniaje zbližeńnie ź ES. Pry hetym Łukašenka tradycyjna zapeŭniŭ, što «ni ŭ jaki drejf [na Zachad] my nie kładziemsia».
Miž tym jon hatovy «zmahacca za zonu svabodnaha handlu, što ŭklučaje nas i Jeŭrasajuz». A taksama z Ukrainaj i dziaržavami Bałtyi pracavać nad raźvićciom «tak zvanaha kalidora № 9 z varahaŭ u hreki», na što miarkujecca atrymać miljard jeŭra inviestycyj. Vidavočna, što takija sumy natchniajuć aficyjny Minsk bolej, čym dekłaracyi Jeŭraparłamienta.
Zaznačym: zona svabodnaha handlu vymahaje ŭstupleńnia krainy ŭ Suśvietnuju handlovuju arhanizacyju i ŭvohule ŭstalavańnia cyvilizavanych pravił hulni ŭ ekanomicy. Uklučna z admovaj ad ulubionaha pratekcyjanizmu. Kali namier surjozny, to daviadziecca značna karektavać «biełaruskuju madel».
Daŭšy adłup «ukidam», što Biełaruś nibyta majecca pradavać S-300 dy «Iskandery» Tehieranu i Damasku, Łukašenka jašče raz pakazaŭ, što vielmi nie choča, kab niejkaja łyžka dziohciu sapsavała zaraz narmalizacyju z Zachadam.
Uvohule značnaja častka vykazvańniaŭ u Salihorsku — heta adbivańnie infarmacyjnych atak Maskvy. Chvalaj adpaviednych publikacyj jana vydaje svajo sapraŭdnaje, adroznaje ad taho, što dekłarujecca z kryvymi dypłamatyčnymi ŭśmieškami, staŭleńnie da ŭdziełu Biełarusi va «Uschodnim partniorstvie».
Biełaruski kiraŭnik tuju prahramu choć i ŭchvalaje, ale pry hetym nie zdradžvaje sabie. Voś jahonaja fiłasofija prahmatyzmu ŭ stasunkach z Zachadam:
«Pry čym tut pravy čałavieka da nafty i hazu? Dzie ZŠA kuplajuć naftu i haz — chiba ŭ samych demakratyčnych, na ich dumku, dziaržavach?».
Jeŭropie daviadziecca mieć spravu ź ćviordym areškam.
