Achoŭny ŭzrovień antyciełaŭ dosyć chutka źnižajecca paśla zaražeńnia karanavirusam. Da takoj vysnovy pryjšli navukoŭcy ŭ novym daśledavańni, piša BBC.
Antycieły źjaŭlajucca klučavoj častkaj imunnaj abarony i nie dazvalajuć virusu pranikać u kletki arhanizma.
Kamanda Impierskaha kaledža Łondana vyjaviła, što kolkaść ludziej z stanoŭčym vynikam testu na antycieły źniziłasia na 26% z červienia pa vierasień.
Navukoŭcy śćviardžajuć, što imunitet zhasaje, tamu jość ryzyka zarazicca virusam niekalki razoŭ.
U Anhlii bolš za 350 tysiač čałaviek pratestavali na antycieły ŭ ramkach daśledavańnia REACT-2.
U pieršym raŭndzie testavańnia, u kancy červienia-pačatku lipienia, antycieły da SOVID-19 vyjavili prykładna ŭ 60 z 1000 ludziej.
Ale padčas apošniaj sieryi testaŭ, jakuju praviali ŭ vieraśni, ich mieli tolki 44 z 1000.
«Imunitet słabieje davoli chutka, prajšło ŭsiaho try miesiacy, i my ŭžo bačym źnižeńnie ŭzroŭniu antyciełaŭ na 26%», — kaža adna z daśledčyc, prafiesar Chielen Uord.
Navukoŭcy źviarnuli taksama ŭvahu na toje, što ŭzrovień imunnaj abarony chutčej źnižajecca ŭ ludziej, starejšych za 65 hadoŭ.
Pry hetym davoli šmat miedykaŭ majuć narmalny ŭzrovień antyciełaŭ, što, na dumku daśledčykaŭ, moža być źviazana z rehularnym kantaktam ź virusam.
Antycieły pakryvajuć pavierchniu karanavirusa, kab spynić jaho ŭvarvańnie ŭ kletki našaha cieła.
Paćvierdžanych vypadkaŭ paŭtornaha zaražeńnia SOVID-19 pakul što było zafiksavana vielmi mała.
I jość nadzieja, što paŭtornaja infiekcyja budzie pieranosicca lahčej, čym pieršaja, pakolki arhanizm pavinien mieć «imunnuju pamiać» ab pieršym sutyknieńni z chvarobaj i viedaje, jak supraciŭlacca.
Daśledčyki kažuć, što ich vyniki nie adprečvajuć nadzieju na atrymańnie dziejsnaj vakcyny. «Reakcyja na vakcynu moža adroźnivacca ad reakcyi na naturalnuju infiekcyju», — kaža prafiesar Poł Eliat, dyrektar prahramy REACT-2.
Ale, na jaho dumku, całkam mahčyma, što niekatorym ludziam spatrebicca revakcynacyja dla adnaŭleńnia imunitetu.
