U vieraśni dvaich minčukoŭ zatrymali paśla taho, jak jany sprabavali adnavić miemaryjał Alaksandru Tarajkoŭskamu — nadpis na asfalcie «Nie zabudziem». Ciapier ludziam vystaŭlajuć pa dva artykuły kryminalnaha kodeksa, za jakija im pahražaje pakarańnie da 10 hadoŭ, piša Tut.by.
Nahadajem, 25-hadovaja minčanka Maryja Babovič 9 vieraśnia pisała hruntoŭkaj na asfalcie kala stancyi mietro «Puškinskaja» dźvie litary z frazy «Nie zabudziem».
Tady dziaŭčynu zatrymali pa 339-m artykule KK RB za chulihanstva. Praź niekalki dzion Maryju vypuścili, ale paźniej znoŭ vyklikali ŭ milicyju dla pakazańniaŭ, u pastanovie jana ŭbačyła inšy artykuł KK RB-341 (apahańvańnie zbudavańniaŭ i psavańnie majomaści) KK RB. Tady dziaŭčyna zastavałasia na voli.
U pastanovie było paznačana, što «psavańnie majomaści» naniesła materyjalnuju škodu «Harramaŭtadoru Minharvykankama» na ahulnuju sumu 10 182 rubli 52 kapiejki (bolš 377 bazavych vieličyń).
Advakat Maryi Andrej Mačałaŭ paviedamiŭ: ciapier Maryja pad vartaj u SIZA ŭ Žodzina. Artykuł pavodle jaje spravy pierakvalifikavali. Ciapier dziaŭčynu abvinavačvajuć pa dvuch artykułach Kryminalnaha kodeksa RB — pa č. 2 art. 339 i č. 2 art. 218.
Suda da hetaha momantu nie było, kali jon projdzie — nieviadoma. Padrabiaznaści śledstva advakat Mačałaŭ raspaviadać admoviŭsia.
Praz nadpis zatrymali i 42-hadovaha minčuka Dzianisa Hrachanava, jahonaja mama raspaviała, što 9 vieraśnia ŭviečary jon byŭ adnym z tych, chto adnaŭlaŭ nadpis na miemaryjale.
— Jon byŭ adzin, potym da jaho padyšli dva chłopcy, jakija prosta hladzieli. Kali na Puškinskuju pryjechali siłaviki, syn adtul źjechaŭ na rovary. A 10 vieraśnia pryjšli dadomu i zabrali — vyličyli pa kamierach. Sutki jon pravioŭ u RUUS, potym na Akreścina. 13 vieraśnia jaho vypuścili. Skazali čakać suda. 22 kastryčnika pryjšli i skazali prajści na razmovu sa śledčym — i ŭsio, z kancami. Spačatku śledčy skazaŭ, što jaho pavinny pieravieści ŭ Žodzina z Akreścina, ale ciapier naohuł nieviadoma — dzie jon, — raspaviadaje jahonaja mama Dzina.
Pa słovach mamy, artykuł u hety raz «abciažaryli», a vystaŭleny ŭron «Harramaŭtadaru», jaki da hetaha składaŭ 7 tysiač 500 rubloŭ, pavialičyli da 10 tysiač.
U vieraśni Dzianisa zatrymlivali pa 341 artykule KK RB( apahańvańnie zbudavańniaŭ i psavańnie majomaści), a ciapier spravu pierakvalifikavali pa takich ža dvuch artykułach, jak i ŭ Maryi Babovič — č. 2 art. Jon pad vartaj.
Blizkim Dzianisa viadoma, što jon nie zhadžaŭsia z abvinavačvańniem i ličyŭ, što składu złačynstva ŭ jaho ŭčynkach niama, mužčyna źbiraŭsia chadajničać ab spynieńni kryminalnaj spravy.
