Skrynšot z president.gov.by
Hetaja ŭstanova, pavodle jaho, budzie «apierataram nacyjanalnaha dyjałohu ad apazicyi» z metaj źmianieńnia Kanstytucyi. Zajava prahučała na zapisie pieradačy dla telekanała ANT, jaki maje vyjści ŭ efir uviečary 11 listapada, piša «Radyjo Svaboda».
Pavodle Vaskrasienskaha, hatoŭnaść da ŭdziełu ŭ takim dyjałohu vykazali ŭ Kaardynacyjnaj radzie, adkul nibyta jamu vysłali 70 staronak svaich prapanovaŭ i źmienaŭ u dziejnaje zakanadaŭstva. Praŭda, chto kankretna heta zrabiŭ, jon nie skazaŭ.
U pres-słužbie Kaardynacyjnaj rady zajavili z hetaj nahody: «Kaardynacyjnaja rada nie viadzie dyjałohu ź Juryjem Vaskrasienskim i nie nakiroŭvała nijakich prapanoŭ dla źmieny zakanadaŭstva».
Bolšaja častka prezidyuma Kaardynacyjnaj rady znachodzicca ŭ turmie abo ŭ vymušanym vyhnańni za miažoj.
Aprača Vaskrasienskaha, u zapisie pieradačy ŭdzielničali staršynia ŁDPB Siarhiej Hajdukievič, staršynia BNF Ryhor Kastusioŭ i praŭładny palitolah Alaksandr Špakoŭski.
Ryhor Kastusioŭ paviedamiŭ «Svabodzie», što na zapisie pieradačy vykazaŭ svaju pazicyju: pieramovy z uładami mahčymyja paśla vykanańnia pieradumovaŭ, takich jak vyzvaleńnie palitviaźniaŭ, rasśledavańnie faktaŭ śmierciaŭ i katavańniaŭ padčas razhonaŭ demanstracyj pratestu, zhodna z tymi zajavami, jakija pastupili ŭ Śledčy kamitet, spynieńnie hvałtu na vulicach biełaruskich haradoŭ i zabieśpiačeńnie vykanańnia dziejnaj Kanstytucyi, u jakoj zapisanyja pravy hramadzian na svabodu słova, schodaŭ i demanstracyj.
«Pazicyja partyi takaja: kali hetyja pieradumovy buduć vykananyja, to my hatovyja dałučycca da pieramovaŭ z uładami», — skazaŭ Kastusioŭ.
