U dvary na vulicy Kurčatava ŭ Hrodnie ŭčora ŭviečary zatrymali 17 čałaviek, paviedamlaje S13. Paśla prafiłaktyčnaj hutarki ŭ Leninskim RAUS usich adpuścili.
Zatrymanych źniali na videakamieru i dali padpisać papieru ab papiaredžańni. Adnoj z žančyn stała błaha — jaje zabrała chutkaja, raspaviali S13 vidavočcy.
Na rajonnyja čajavańni hrodziency tradycyjna źbirajucca pa sieradach i subotach.
— Užo ŭ minułuju subotu na naša zvykłaje miesca pryjechali taniravanyja busy, tamu nam daviałosia pamianiać miesca zboru. Učora my tradycyjna sabralisia na čajavańnie, u niejki momant u dvor pryjechali niekalki mikraaŭtobusaŭ, ź ich vyjšli kala 40 amapaŭcaŭ — i pačalisia zatrymańni.
Usich zatrymanych advieźli ŭ Leninski RAUS. Tam spytali, što jany rabili na vulicy, papiaredzili ab adkaznaści za ŭdzieł u niesankcyjanavanym mierapryjemstvie i adpuścili.
U hety ž viečar u mnohich hrodzienskich rajonach vyjšli ludzi ŭ znak salidarnaści z zatrymanymi na Dzieviatoŭcy, kažuć vidavočcy.
«Narmalnyja ludzi pjuć čaj doma»
Aficyjny pradstavić UUS pa Hrodzienskaj vobłaści Jaŭhien Dudko daŭ S13 kamientar nakont učorašnich zatrymańniaŭ na Kurčatava:
— Kala 21.00 na vulicy Kurčatava ŭ dvarach sabralisia hramadzianie. Nam pastupiła paviedamleńnie ab tym, što ŭ dvarach sabrałasia vialikaja kolkaść ludziej. Na miesca prybyli supracoŭniki AMAPa. U Leninski RAUS było dastaŭlena 17 čałaviek: 13 žančyn i 4 mužčyny. U ich pravieryli dakumienty dla vyśviatleńnia asoby, praviali hutarku i adpuścili dadomu».
Pradstaŭnik milicyi Haradzienščyny taksama paličyŭ mahčymym acanić «narmalnaść» udzielnikaŭ čajavańnia:
— Narmalnyja ludzi ŭ viačerni čas u listapadzie pjuć čaj doma.
