Mikołu Dziadka, błohiera, anarchista i palityčnaha analityka, jakoha zatrymali 12 listapada, pryznali padazravanym pa kryminalnaj spravie ab arhanizacyi masavych biesparadkaŭ. Jon znachodzicca ŭ turmie na Akreścina, siońnia ŭ jaho prajšoŭ dopyt z udziełam advakata. Pra heta «Svabodzie» paviedamiŭ baćka aryštavanaha Alaksandar Dziadok.
Pavodle jahonych słovaŭ, advakat zajaviŭ śledčamu chadajnictva nakont jahonaha medycynskaha ahladu, pakolki jana pabačyła na im cialesnyja paškodžańni, a taksama ab praviadzieńni sudova-medycynskaj ekspertyzy. Samo videa, apubikavanaje MUS, śviedčyć ab pabojach syna, kaža Alaksandar Dziadok.
«Jaho źbili samym žorstkim čynam, jon byŭ pad uździejańniem mocnaha hvałtu, jakim jany prymusili jaho kazać usiakaje hłupstva. Ciažka skazać, nakolki hetaje źbićcio pahražaje stanu jahonaha zdaroŭja, bo advakat nia lekar, jana pabačyła ślady pabojaŭ tolki na tvary, bolš jaho nichto nie ahladaŭ. Pry hetym jon sam skazaŭ advakatu, što jaho mocna źbili».
Alaksandar Dziadok nie vyklučaje, što sam budzie padavać skarhu na źbićcio syna pry zatrymańni, ale sumniajecca, što heta niešta daść:
«U našaj krainie nijakich lehalnych sposabaŭ damahčysia praŭdy niama, usie čuli frazu «Nie da zakonu», jakaja prahučała na samym viersie».
«Jany nachabnyja złačyncy, jakija dazvalajuć sabie ŭsio, što mahčyma, pakolki im heta dazvolena i ŭkazana źvierchu. Aprača taho, ja pierakanany, što hetaje videa zroblena z prapahandysckimi metami, kab zapałochać inšych ludziej i padavić samoha Mikałaja, čałavieka vysokaadukavanaha, jaki prafesijna zajmajecca palitalohijaj, błohiera i žurnalista. Jaki havaryŭ adkryta i sumlenna pra toje, što adbyvajecca. Takim čynam jamu chacieli zatknuć rot i prynizić».
Abvinavačańni ŭ arhanizacyi masavych biesparadkaŭ baćka Dziadka ličyć absurdnym:
«Ni ŭ jakich arhanizacyjach jon nia ŭdzielničaŭ, nia braŭ udziełu ŭ padrychtoŭcy masavych akcyj, heta sproby pryciahnuć za vušy… Ale tyja, chto jaho zatrymlivaŭ, zdolnyja na lubuju chłuśniu i falsyfikacyi».
Telehram-kanał Ministerstva ŭnutranych spraŭ 12 listapada paviedamiŭ, što supracoŭniki Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj zatrymali 32-hadovaha Mikołu Dziadka.
U paviedamleńni havorycca, što ŭ svaim telehram-kanale jon «publična zaklikaŭ da ŭdziełu ŭ masavych biesparadkach i siłavych akcyj «pramoha dziejańnia». Dziadok padazravany pa spravie ab arhanizacyi masavych biesparadkaŭ.
Na videa, jakoje raspaŭsiudziła MUS, Mikoła Dziadok vyhladaje mocna źbitym, na tvary ŭ jaho paškodžańni.
Na kanśpiratyŭnaj kvatery ŭziali lidara anarchistaŭ Dziadka. Pahladzicie, u jakim jon stanie paśla zatrymańnia VIDEA
U 2010 hodzie Mikoła Dziadok byŭ zatrymany pa spravie ab napadzie na ambasadu Rasiejskaj Federacyi. U źniavoleńni jon byŭ amal piać hadoŭ — ad vieraśnia 2010 da žniŭnia 2015. Paśla vyzvaleńnia žyŭ u Miensku, Vilni, Koŭnie. Adnaviŭsia ŭ Eŭrapiejskim humanitarnym universytecie i skončyŭ navučańnie pa prahramie «Mižnarodnaja palityka i ekanomika».
