Aniestezijołaha Dźmitryja Kaŭko, jaki pracuje ŭ klinicy «Novy zrok» i RNPC dziciačaj chirurhii, zatrymali ŭ čaćvier, 12 listapada, niepasredna na pracy. Noč doktar pravioŭ na Akreścina. Siońnia jaho adpuścili, a spravu adpravili na dapracoŭku.
Dźmitryja zabrali ŭ milicyju prosta z apieracyi.
«Pastupiła infarmacyja, što na resepšenie čakajuć try čałavieki ŭ cyvilnym, tamu ja vymušany byŭ spuścicca. U hety čas u apieracyjnaj prachodziła ahulnaja aniestezija. Na apieracyju ja ŭžo nie viarnuŭsia, paviedamiŭ kiraŭnictvu i pačaŭ źbirać rečy. Na apieracyi zastaŭsia naparnik, jon rabiŭ padvojnuju pracu — heta našmat składaniej, bolš ryzyki dla pacyjenta», — raspavioŭ doktar «Našaj Nivie».
Dźmitryja abvinavačvali va ŭdziele ŭ akcyi miedykaŭ 7 listapada. U tuju subotu jon sapraŭdy byŭ pobač, pracavaŭ u RNPC, ale na marš nie chadziŭ. Z unutranaha dvoryka tolki źniaŭ, jak kaleh pakujuć u aŭtazak.
Jon miarkuje, što jaho vyličyli pa naładkach telefona i zabrali apytać najpierš u ramkach kryminalnaj spravy, pa jakoj u Dźmitryja doma prachodziŭ pieratrus 1 kastryčnika. Paśla taho pieratrusu doktar pisaŭ list u RUUS, kab jamu viarnuli rečy. A kali tam adkazali, što ich pieradali ŭ Śledčy kamitet, napisaŭ tudy.
«Kali ŭčora pa mianie pryjšli, pieršaje pytańnie milicyjanta było: «Vy pisali nam list u RUUS?» Kažu: pisaŭ. «Nu tady prajedziemcie z nami ŭdakładnić usie abstaviny». Dopyt pieravažna pravodziŭsia pa kryminalnaj spravie i tym pieratrusie, jaki ŭ mianie byŭ. A naprykancy ŭžo naviesili artykuł 23.34, tamu što ŭbačyli dva zdymki ŭ telefonie», — padzialiŭsia Dźmitryj.
U piatnicu byŭ sud. Pasiadžeńnie viała sudździa Savieckaha rajona Alena Žukovič. Spravu ŭ vyniku adpravili na dapracoŭku: na kamierach nazirańnia RNPC bačna, što aniestezijołah u toj čas znachodziŭsia va ŭnutranym dvoryku, a nie kala prajeznaj častki, jak śćviardžaŭ śviedka ź milicyi.
Sud na doktaram. Sudździa Alena Žukovič vyrašyła pravodzić praces u svaim kabiniecie, tamu niekalki dziasiatkaŭ čałaviek, jakija pryjšli padtrymać miedyka, pakinuli na kalidory. Ludzi sprabujuć pačuć choć niešta praź dźviery
U jakim statusie doktar prachodzić pa kryminalnaj spravie, jon dahetul nie viedaje.
«Čamu ź pieratrusam prychodzili, dla mianie samoha pytańnie. Moža, heta pa niejkaj strajkbolnaj temie, bo ŭ mianie zabrali pryłady dla hulni ŭ strajkboł».
Zaŭtra Dźmitryju na post.
«Taki sieryjał: jak pabyvać za kratami i patrapić na pracu biez spaźnieńnia», — pažartavaŭ doktar.