nlb.by
Rektar Biełaruskaj dziaržaŭnaj akademii mastactvaŭ Michaił Barazna adkazaŭ na kalektyŭny zvarot, jaki tyčycca adličanych studentaŭ. 29 kastryčnika teatralny krytyk i kandydat mastactvaznaŭstva Kryścina Smolskaja addała dakumient administracyi akademii. U im padpisanty (siarod ich ciapierašnija studenty, vypuskniki VNU i vykładčyki) zapatrabavali adnavić adličanych studentaŭ i spynić cisk na navučencaŭ i vykładčycki skład. Adkaz atrymany 17 listapada, piša Tut.by.
Vykładzienyja patrabavańni rektar Michaił Barazna nazvaŭ nieadpaviednymi.
U adkazie padkreślivajecca, što dahavornyja adnosiny pamiž navučencami i ŭstanovaj adukacyi rehulujucca normami zakanadaŭstva Respubliki Biełaruś. Kankretna — 79-m i 126-m artykułami Kodeksa ab adukacyi.
«Za čas isnavańnia z BDAM byŭ adličany nie adzin dziasiatak studentaŭ, mahistrantaŭ pa roznych pryčynach, u tym liku i pa vinavatych padstavach», — havorycca ŭ dakumiencie. Što heta za «vinavatyja padstavy», nie ŭdakładniajecca. Taksama rektar nahadaŭ adličanym studentam, što jany majuć prava na adnaŭleńnie, akramia vypadkaŭ, vyklučanych Kodeksam ab adukacyi.
U kancy adkazu Michaił Barazna padkreśliŭ: patrabavańnie, vykładzienaje ŭ kalektyŭnym zvarocie, «hałasłoŭna», nie paćvierdžanaje dakumientalna i nieabjektyŭna. «BDAM nie maje nie tolki zakonnych padstaŭ na «adnaŭleńnie ŭžo adličanych», ale i nie bačyć padstaŭ u dadzienaj častcy vašaha patrabavańnia. U pryvatnaści, ź jakoj metaj nieabchodna «adnavić užo adličanych», kali adličanyja z BDAM zaviaršyli zasvajeńnie adukacyjnaj prahramy?» — zadaje pytańnie rektar.
Što značyć «zaviaršyli zasvajeńnie adukacyjnaj prahramy», u adkazie Barazny taksama nie tłumačycca. Bolšaść adličanych studentaŭ nie byli navučencami vypusknoha kursa: siarod ich byli i treciakurśniki, i navat druhakurśniki.
