Avaryja adbyłasia ŭviečary 21 listapada na terytoryi Drybinskaha rajona.

«37-hadovaja žycharka vioski Michiejeŭka, ruchajučysia na aŭtamabili Mitsubishi ździejśniła najezd na 61-hadovuju žycharku vioski Rusienka, jakaja ruchałasia pa centry prajeznaj častki darohi. U vyniku DTZ žančyna atrymała traŭmy, ad jakich pamierła na miescy zdareńnia. Niahledziačy na ciomny čas sutak, u piešachoda adsutničali śviatłoadbivalnyja elemienty», — paviedamiła milicyja Mahiloŭskaj vobłaści.

Paźniej stała viadoma, što kiravała aŭtamabilem Łarysa Kryvickaja, namieśnica staršyni Horackaha rajvykankama.

«Naša Niva» źviazałasia z čynoŭnicaj. Jana paćvierdziła, što była za rulom. Ciapier Śledčy kamitet zavioŭ kryminalnuju spravu pa fakcie zdareńnia. Łarysa Kryvickaja prachodzić jak padazravanaja — jana na voli, ale pad padpiskaj.

Ananimnyja telehram-kanały adrazu abvinavacili čynoŭnicu, što jana była za rulom napadpitku.

«Ja nie ŭžyvaju ałkaholu uvohule. Apošni miesiac ja navat kvasu nie piła. I ŭsie ekśpiertyzy pakazali ŭ mianie nul pramile», — adkazała Kryvickaja.

Taksama čynoŭnica źviartaje ŭvahu na paškodžańni mašyny.

«Ź jakoha boku ruchaŭsia piešachod, kali ŭdar byŭ z boku kiroŭcy? Žančyna prosta stajała na prajeznaj častcy.

Ciapier śledstva viadziecca. Budzie jašče śledčy ekśpierymient, jaki budzie vyśviatlać, ci mahła ja ŭbačyć hetuju žančynu, — kaža Łarysa Kryvickaja.

— Usie my chodzim pad Boham. I barani Boža kamuści apynucca na maim miescy! Heta prosta sprava vypadku, absalutna. U hety dzień adbyłosia jašče niekalki DTZ, ale rezanans nabyło tolki majo zdareńnie. Čamu?

Ja nikomu nie zyču apynucca na maim miescy. Chaj usie darohi buduć biez takich niaŭvažlivych babul na darozie. Ja nikomu nie zyču zła, tamu budźcie ŭvažlivyja na darohach, bieražycie siabie i svaich blizkich».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?