Andrej Jelisiejeŭ, ekśpiert analityčnych centraŭ EAST i iSANS, padzialiŭsia svaim mierkavańniem adnosna novaha błoka sankcyj Jeŭrasajuza, pryniatych suprać čynoŭnikaŭ i biznesmienaŭ ź Biełarusi.
Andrej Jelisiejeŭ. Fota baj.by.
«Samaje važnaje na hetym etapie, što Jeŭrasajuz vyjšaŭ na jakasna inšy ŭzrovień sankcyj, dadaŭšy da asob kankretnyja kampanii. U ES niemałaja biurakratyja ŭ pryniaćci sankcyj, tamu čakać uklučeńnia dziasiatkaŭ kampanij u pieršy zachod i nie vypadała. Pakolki Jeŭrasajuz dadaŭ u śpis takija asoby, jak Šakucin i Vierabiej, imavierna ŭ nastupnyja zachody sankcyi buduć pašyracca i na ichnija aktyvy. Ministry krain ES zvyčajna źbirajucca prynamsi raz na miesiac, tamu dalejšaje pašyreńnie śpisu moža adbycca ŭžo ŭ studzieni-lutym.
Što da efiektyŭnaści sankcyj, to navukovy analiz śviedčyć, što sankcyi ŭ dačynieńni «kašalkoŭ» aŭtarytarnych režymaŭ davoli balučyja dla ich. Mienavita piersanalisckija aŭtarytarnyja režymy z bolšaj imaviernaściu destabilizujucca praz padobny sankcyjny cisk, čym adnapartyjnyja i kalehijalnyja vajskovyja dyktatury. Ale ž kazać usurjoz pra taki efiekt sankcyj možna było b tolki ŭ razie značnaha pašyreńnia śpisu i praciahłaści ich dziejańnia.
Pakul ža havorka idzie chutčej pra pahrozu (!) šyrejšych sankcyj, čym pra efiekt ad užo dziejnych. Sankcyi ES u ciapierašnim vyhladzie prydatnyja nie dla destabilizacyi palityčnaha režymu, a dla pakarańnia (časta simvaličnaha) asob, naŭprost ź im źviazanych».
