MUS Biełarusi i Rashvardyja zaklučyli pahadnieńnie ab supracoŭnictvie. Dakumient apublikavany na Nacyjanalnym pravavym internet-partale.
Viedamstvy majuć supracoŭničać pa pytańniach achovy hramadskaha paradku, važnych dziaržabjektaŭ i śpiecyjalnych hruzaŭ, baraćby z teraryzmam i ekstremizmam, dziaržkantrolu ŭ halinie zvarotu zbroi, zabieśpiačeńnia biaśpieki abjektaŭ paliŭna-enierhietyčnaha kompleksu, achovy asabliva važnych i režymnych abjektaŭ, majomaści fizičnych i jurydyčnych asob, zabieśpiačeńnia mierapryjemstvaŭ siłavoj padtrymki pa supraćdziejańni złačynnaści i inš.
U dakumiencie paznačana, što supracoŭnictva ažyćciaŭlajecca na padstavie zapytaŭ adnaho z bakoŭ ab akazańni sadziejničańnia. Inicyjatyvu taksama moža prajavić bok, jaki ličyć, «što takoje sadziejničańnie ŭjaŭlaje cikavaść dla inšaha». Dla hetaha adzin bok pavinna nakiravać inšamu piśmovy zapyt. Dapuskajecca i pieradača zapytu na supracoŭnictva ŭ vusnaj formie, potym nieabchodna paćvierdzić jaho piśmova.
Možna admovicca całkam abo častkova ad sadziejničańnia ŭ ramkach pahadnieńnia. Heta mahčyma, kali bok, jaki prosiać ab sadziejničańni ličyć, što vykanańnie zapytu moža nanieści škodu suvierenitetu, biaśpiecy, hramadskamu paradku abo inšym istotnym intaresam jaje dziaržavy albo supiarečyć zakanadaŭstvu abo mižnarodnym abaviazacielstvam jaho dziaržavy.
U dakumiencie adznačana, što baki samastojna niasuć vydatki, nieabchodnyja dla vykanańnia pahadnieńnia, choć možna i ŭzhadnić inšy paradak u kožnym kankretnym vypadku.
Taksama vyznačana mova, jakoj pavinny karystacca baki padčas ažyćciaŭleńnia supracoŭnictva, — ruskaja.
Pahadnieńnie ŭstupaje ŭ siłu z daty jaho padpisańnia. Jano budzie dziejničać jašče paŭhoda z daty atrymańnia adnym z bakoŭ piśmovaha paviedamleńnia, što druhi bok choča spynić jaho dziejańnie.
U kancy žniŭnia Uładzimir Pucin zajaviŭ, što Rasija na prośbu Alaksandra Łukašenki sfarmavała rezierv z supracoŭnikaŭ pravaachoŭnych orhanaŭ dla dapamohi Biełarusi, adznačaje Tut.by.
— Alaksandr Ryhoravič paprasiŭ mianie sfarmavać peŭny rezierv z supracoŭnikaŭ pravaachoŭnych orhanaŭ. I ja heta zrabiŭ. Ale my damovilisia taksama, što jon nie budzie vykarystany da taho času, pakul situacyja nie budzie vychodzić z-pad kantrolu i kali ekstremisckija — ja chaču heta padkreślić — elemienty… da taho času nie budzie vykarystoŭvacca, pakul ekstremisckija elemienty, nie prykryvajučysia palityčnymi łozunhami, nie pieradaduć, nie piarojduć peŭnych miežaŭ i nie pierastupiać, nie piarojduć prosta da razboju, nie pačnuć padpalvać mašyny, damy, banki, sprabavać zachoplivać administracyjnyja budynki i hetak dalej, — zajaviŭ tady Pucin.
