Dzianis Kireščanka i Uładzimir Haroch, Tut.by.
U sudzie Navahrudskaha rajona 29 śniežnia vyniesieny prysud palityčnym źniavolenym Uładzimiru Harochu i Dzianisu Kireščanku, piša spring96.org.
Sudździa Vasil Alachnovič pryznaŭ ich vinavatymi (Uładzimira Harocha — pa č.1 art. 13, č.1 art. 293, č.1 art. 368 Kryminalnaha kodeksa, Dzianisa Kireščanku — pa č.3 art.293 Kryminalnaha kodeksa).
Uładzimir Haroch atrymaŭ 6 hadoŭ i 6 miesiacaŭ pa č. 1 art. 293 i 1 hod pa art. 368. Šlacham častkovaha składańnia kančatkovaje pakarańnie skłała 7 hadoŭ pazbaŭleńnia voli ŭ kałonii ŭzmocnienaha režymu.
Dzianis Kireščanka — 1 hod i 6 miesiacaŭ pazbaŭleńnia voli ŭ kałonii ahulnaha režymu.
Uładzimira Harocha zatrymali 18 žniŭnia. Zhodna z abvinavačvańniem, hetym letam jon naŭmysna rychtavaŭsia da masavych biesparadkaŭ u Navahrudku i niekatorych inšych nasielenych punktach i namahaŭsia pryciahnuć da ich vialikuju kolkaść ludziej. Dla hetaha jon płanavaŭ i pravodziŭ sustrečy ź ludźmi ŭ Navahrudku i Kareličach.
Zhodna z aficyjnaj viersijaj, Haroch padčas sustreč kazaŭ, što 10 žniŭnia płanuje padpalvać budynki, supraciŭlacca ŭładam i błakavać darohi śpiłavanymi drevami. Adnak jon nie paśpieŭ ničoha zrabić, bo siomaha žniŭnia jaho dziejnaść vykryli i spynili milicyjanty.
Taksama jaho abvinavacili ŭ publičnaj abrazie Łukašenki: 14 žniŭnia jon raźmiaściŭ u čacie «Navahrudak dla žyćcia» «nieprystojnyja pa formie i prynižalnyja pa nakiravanaści vykazvańni…iakija ŭtrymlivajuć niehatyŭnuju acenku A.Łukašenki». U hety čas jaho dzieci byli zatrymanyja padčas mirnych pratestaŭ u Minsku.
Dzianisa Kireščanku zatrymali 8 žniŭnia i abvinavacili pa č.3 art.293 Kryminalnaha kodeksa (Navučańnie masavym biesparadkam). Zhodna z abvinavačvańniem, 5 žniŭnia ŭ Kareličach padčas sustrečy ź ludźmi paviedamiŭ pra mahčymaść vykarystać ŭ jakaści zbroi i akazańnia supracivu teleskapičnyja dručki, a taksama prademanstravaŭ, jak ź imi treba abychodzicca. Taksama, zhodna z abvinavačvańniem, jon paviedamiŭ pra asob, jakija hatovyja ŭdzielničać u masavych biesparadkach, a taksama pra mahčymaść apłaty.
Na papiarednim pasiadžeńni prakuror zapatrabavaŭ dva hady pazbaŭleńnia voli ŭ kałonii ahulnaha režymu dla Dzianisa Kireščanki i vosiem hadoŭ pazbaŭleńnia voli ŭ kałonii ŭzmocnienaha režymu — dla Uładzimira Harocha. Abvinavačanyja vinu nie pryznali.
