Minułyja sutki byli niaprostyja: mocny viecier, hałalod i ŭtvareńnie lodu pa ŭschodzie krainy. U 15.22 na mieteastancyi «Orša» dyjamietr hałalodu dasiahnuŭ kryteryju niebiaśpiečnaj źjavy — 20 mm, paviedamlaje 112.by.

 Usiaho byli zafiksavanyja 163 vypadki padzieńnia dreŭ, u vyniku jakich paškodžany 28 aŭtamabilaŭ: u Viciebskaj vobłaści — 106 vypadkaŭ, 22 aŭtamabili; u Hrodzienskaj — piać vypadkaŭ; u Minskaj — dva vypadki; u Mahiloŭskaj - 50 vypadkaŭ, šeść aŭtamabilaŭ.

U Viciebskim rajonie drevy ŭpali na čyhunačnyja rejki i pavietranyja linii elektrapieradačy, pryznačanyja dla siłkavańnia stancyjnych i pierahonnych pryład aŭtamatyki.

Zatrymka ruchu 10 pasažyrskich ciahnikoŭ skłała ad 18 chvilin da 1 hadziny 14 chvilin, adnaho hruzavoha ciahnika — 2 hadziny 57 chvilin.

U Mahilovie praz utvareńnie toŭstaha płastu lodu na tralejbusnych kantaktnych linijach na 12 maršrutach nie vyjšli 76 tralejbusaŭ. U Breście na vulicy Haŭryłava paryvam vietru sarvała navies prypynačnaha punkta. Traŭmy atrymali dźvie žančyny, jany špitalizavanyja.

U Aršanskim rajonie byli adpraŭlenyja ŭ inšyja ŭstanovy 44 pacyjenty z Arechaŭskaj i Miežaŭskaj učastkovych balnic, jakija zastalisia biez elektra - i ciepłazabieśpiačeńnia.

Ciaham sutak pieryjadyčna parušałasia elektrazabieśpiačeńnie 1627 nasielenych punktaŭ (ź ich 652 - u Viciebskaj, 584 - u Mahiloŭskaj i 227 - u Homielskaj abłaściach).

Pa stanie na 8.00 zastajucca biez elektrazabieśpiačeńnia 716 nasielenych punktaŭ u Viciebskaj, Homielskaj, Minskaj i Mahiloŭskaj abłaściach.

Клас
Панылы сорам
Ха-ха
Ого
Сумна
Абуральна