Illa Turkoŭ u zali suda. Fota: spring96.org.
Ranicaj 30 śniežnia ŭ sudzie Pieršamajskaha rajona h. Minska praciahnuŭsia razhlad spravy ŭ dačynieńni da Illi Turkova, jakoho vinavaciać pa č. 1 art. 342 i art. 364 Kryminalnaha kodeksa za padziei kala st. m. Płošča Pieramohi 14 lipienia, paviedamlaje Viasna.
Siońnia padsudny vystupiŭ z apošnim słovam. U pramovie Illa Turkoŭ jašče raz paŭtaryŭ, što ščyra raskajvajecca i raniej prasiŭ prabačeńnia ŭ paciarpiełaha, hatovy spłacić iskavyja patrabavańni, jakija zajaviŭ paciarpieły.
Abvinavačany źviarnuŭ uvahu sudu na toje, što piać miesiacaŭ znachodzicca pad vartaj, i hety čas jaho siamja zastajecca biez srodkaŭ dla isnavańnia, bo žonka tolki niadaŭna vyjšła z dekretnaha adpačynku, a ŭ dziciačym sadku — karancin praz karanavirus. Taksama Illa Turkoŭ kazaŭ i pra toje, što ŭ ich pryvatnym domie aciapleńnie drovami i jość nievialikaja haspadarka, a dla jaho žonki ŭsio heta ciažkaja fizičnaja praca.
Jon prasiŭ sud prajavić čałaviečuju vielikadušnaść pry vybary vidu i terminu pakarańnia, nie sudzić jaho stroha.
Rašeńnie suda było abvieščanaje ŭ 12.30.
Kančatkovaje pakarańnie — pazbaŭleńnie voli na termin čatyry hady z adbyvańniem pakarańnia ŭ papraŭčaj kałonii va ŭmovach ahulnaha režymu.
Akramia taho, vyrašyli spahnać z asudžanaha na karyść paciarpiełaha amapaŭca Ihara Astapuka materyjalnuju kampiensacyju maralnaj škody ŭ pamiery 500 rubloŭ, a taksama dziaržpošlinu na karyść dziaržavy ŭ pamiery 81 rubla.
Illa Turkoŭ płanuje abskardzić prysud.
