Upieršyniu biełarusy mieli taki vialiki vybar navahodnich jutub-šou. Kolki ludziej addali im pieravahu pierad tradycyjnym telebačańniem i čyje šou stali samymi papularnymi?
Niechta — biezumoŭny lidar. Jaho analityčna-zabaŭlalny navahodni strym sabraŭ 406 tysiač prahladaŭ.
U razmoŭnym strymie byli aktyvistka Nina Bahinskaja, biznesoviec Vadzim Prakopjeŭ, emihrant, były namieśnik kamandzira «Ałmaza» Ihar Makar, eks-śledčy Andrej Astapovič i člen Kaardynacyjnaj rady Volha Kavalkova, a taksama Alena Žyvahłod z Nacyjanalnaha antykryzisnaha ŭpraŭleńnia i pres-sakratar NAU Maks Paršuta.
Pa videasuviazi ŭ pierabiŭkach śpiavaŭ NaviBand, uklučali chity TorBand i ŭspaminali padziei hoda.
U studyi brynkali na hitary, pili šampanskaje, jeli aliŭje, usio było niefarmalna, časam skamiečana i spantanna. Pry hetym źbirali hrošy na dziejnaść miedyja Niechty. Pierad videazvarotam Cichanoŭskaj jon daŭ pieśniu «Razbury turmy mury» ŭ vykanańni siabie samoha.
Navahodniaje vinšavańnie Śviatłany Cichanoŭskaj u jaje na kanale sabrała 263 tysiačy prahladaŭ. Razam ža strymy, dzie ŭklučali zvarot Cichanoŭskaj, sabrali kala 1,2 miljona prahladaŭ za noč. U kanale Cichanoŭskaj kamienty adklučanyja, ale vodhuki na jaje zvarot u inšych kanałach amal tatalna pazityŭnyja. Mnohija žančyny pryznajuć, što płakali, słuchajučy svajho lidara.
Na Biełsacie asobny strym z navahodnim vinšavańniem Śviatłany Cichanoŭskaj sabraŭ 247 tysiač prahladaŭ. «Nievierahodna-navahodni viečar na «Biełsacie» sabraŭ jašče 88 tysiač prahladaŭ. Niemahčyma padličyć, kolki ludziej hladzieła jaho tradycyjna, praz spadarožnik. Jašče 22 tysiačy prahladaŭ sabraŭ paśla poŭnačy «Partyzanski Novy hod na «Biełsacie» — miks biełaruskich chitoŭ — jak kłasičnych, tak i «piesień pratestu» ad «Pravił» Nizkiz da Šarkunovaj.
«Novohodniaja prohramma. 20 protiestnych piesien 2020 hoda» na kanale «Kraina dla žyćcia» byŭ taksama ŭ farmacie muzyka+palityka. 118 tysiač prahladaŭ.
«Žyvie Novy hod!» «Sumlennych ludziej» byli kaktejlem z muzyki, vinšavańniaŭ ad dziejačaŭ kultury, apazicyi, emihracyi i prostych ludziej.
Asablivaściu nie tolki hetaha šou, ale i ŭsich, byŭ demakratyzm. Nizkabiudžetnyja, niekatoryja zusim kapieječnyja — usie jany davali słova tysiačam ludziej, jakija dasłali svaje videa. Biełarusy vychodzili na suviaź ź Japonii, Katałonii, Kanady, Talina, Fiładelfii, Tajłanda, ad varot suda ŭ Haazie i samych kancoŭ śvietu. I tut ža — z Anharskaj, Malinaŭki, Bresta, Homielskaj vobłaści. Heta stvarała niejmaviernuju atmaśfieru jadnańnia pa-nad miežami.
«Žyvie Novy hod!» «Sumlennych ludziej» sabraŭ 90 tysiač prahladaŭ.
Razmoŭna-muzyčnaje šou «Novohodnij efir // Malanka.live» — 66 tysiač prahladaŭ.
«Žyvie Live 2021» — šou ź biełaruska-rasijskimi muzyčnymi zorkami — sabrała 59 tysiač prahladaŭ.
Aryjentavany na padletkaŭ i studentaŭ «Hodny ahaniok — navahodniaja muzyčnaja viečaryna ź jarkimi i modnymi biełaruskimi hrupami i artystami» — 52 tysiačy.
Razam hetyja jutub-strym-šou sabrali za noč bolš za 915 tysiač prahladaŭ. Imavierna, kožny strym hladzieli 4—5 čałaviek — stolki ŭ siarednim źbirajecca za adnym navahodnim stałom.
Kolki hladzieli «Biełsat» praz spadarožnik, źviestak niama.
Ličby prahladaŭ, imavierna, padvojacca za nastupnyja dni.
