Ad 1 studzienia ŭ Biełarusi pavysili staŭki padatku na prybytak dla apieratara pa abaviazkovym akazańni ŭniviersalnych pasłuh elektrasuviazi i apierataraŭ sotavaj suviazi — z 18% da 30%. Źmieny ŭviali abnoŭlenym Padatkovym kodeksam, piša Tut.by.
Jak havorycca ŭ dakumiencie, «u metach pryniaćcia dadatkovych mier pa kansalidacyi dachodaŭ biudžetu dla baraćby z COVID-19 ustanavić, što z 1 studzienia 2021 h. da 1 studzienia 2023 h. apieratary sotavaj ruchomaj elektrasuviazi, a taksama pryznačany ŭ adpaviednaści z zakanadaŭstvam apieratar pa abaviazkovym akazańni ŭniviersalnych pasłuh elektrasuviazi na terytoryi Respubliki Biełaruś vypłačvajuć padatak na prybytak pa staŭcy 30%».
U pres-słužbie A1 zajavili: «My hanarymsia tym, što A1, častka A1 Telekom Austria Group, najbujniejšaha zamiežnaha inviestara ŭ śfiery infarmacyjna-kamunikacyjnych technałohij u Biełarusi, na praciahu mnohich hadoŭ źjaŭlajecca adnym z samych bujnych padatkapłacielščykaŭ ź liku kampanij ź niedziaržaŭnaj formaj ułasnaści.
Pry hetym my vykazvajem škadavańnie ŭ suviazi z tym, što telekamunikacyjnaja i IT-haliny znoŭ sutykajucca z paharšeńniem inviestycyjnaha klimatu dla viadzieńnia biznesu ŭ Biełarusi, u toj čas jak inšyja krainy aktyŭna zaachvočvajuć inviestycyi ŭ śfierach, źviazanych ź infarmacyjnymi technałohijami i ličbavaj transfarmacyjaj.
Pry hetym časovaje pavyšeńnie staŭki padatku na prybytak, praduhledžanaje prajektam zakona «Ab źmienie Padatkovaha kodeksa» dla apierataraŭ sotavaj suviazi, nie adabjecca na abanientach — ciažar padatkovaj nahruzki kampanija voźmie na siabie».
Raniej u pres-słužbie MTS taksama adznačyli, što «mahčymaje źmianieńnie zakanadaŭstva nie akaža ŭpłyvu na źmianieńnie cen dla abanientaŭ».