Pra heta Svabodzie raskazaŭ muž Kaciaryny Andrejevaj Ihar Iljaš. Navinaŭ pra zaviaršeńnie raśśledavańnia ŭ spravie Kaciaryny Barysievič z Tut.by pakul niama.
Žurnalistku «Biełsatu» Kaciarynu Andrejevu zatrymali 15 listapada razam z aperatarkaj Darjaj Čulcovaj padčas strymu z adnaho z damoŭ, raźmieščanych na «Płoščy pieramien». 20 listapada abiedźvium dziaŭčatam vystavili abvinavačvańni ŭ arhanizacyi i padrychtoŭcy dziejańniaŭ, jakija hruba parušajuć hramadzki paradak. Žurnalistak pieraviali z Akreścina ŭ SIZA Žodzina, pravaabaroncy pryznali ich palitviaźniami. Jak raskazaŭ Svabodzie muž Kaciaryny Andrejevaj Ihar Iljaš, sud pa spravie jaho žonki moža pačacca ŭžo ŭ bližejšyja tydni.
«Materyjały spravy Kaciaryny znachodziacca ŭ prakuratury, — havoryć Ihar. — Viedaju ź lista ad jaje, što Kacia čakaje ŭžo etapavańnia ŭ Miensk. Jana piša, što čakaje sudu, ale nia robić nijakich prahnozaŭ nakont jaho vyniku. Datu etapavańnia i sudu pakul nie pryznačyli, padrabiaznaściaŭ pra heta my nia viedajem. Možna mierkavać, što ŭ sud spravu pieradaduć u siaredzinie studzienia».
Ihar Iljaš zaznačaje, što abvinavačvańni žoncy vystavili praź piać dzion paśla zatrymańnia: Kaciarynu zatrymali 15 listapada, a 20-ha vystavili abvinavačańnie.
«Vidavočna, niejki plan u hetych ludziej, jakija davali dabro na Kacinu spravu, jość. Kali paraŭnać z tym, što adbyvajecca ź Iharam Łosikam, jakoha trymajuć pa tym ža artykule ź leta minułaha hodu, to ŭ mianie dva varyjanty tłumačeńnia takoj chutkaści, — kaža Ihar. — Albo jany chočuć zrabić pakazalna žorstki prysud, kab zapałochać žurnalistaŭ. Syhnał, kab nie viali nijakich strymaŭ, nie aśviatlali pratestaŭ. Albo inšy varyjant — chočuć namalavać miakki prysud, štraf albo ŭmoŭny termin ci chatni aryšt. Kab chvala salidarnaści źnikła, kab nie było padstavaŭ znoŭ i znoŭ havaryć pra aryšt žurnalistak. I adnačasova možna było b abmiežavać ich u prafesijnaj dziejnaści».
Pavodle Ihara Iljaša, sudzić Kaciarynu Andrejevu buduć razam z Darjaj Čulcovaj. Advakatka Darji znachodzicca pad padpiskaj ab nierazhałošvańni i amal nie daje infarmacyi pra stan jaje padabaronnaj. Baćki taksama nieachvotna kantaktujuć sa ŚMI. Adnak Čulcova i Andrejeva paŭsiul u dakumentach i materyjałach spravy prachodziać razam, tamu možna mierkavać, što ich sprava pavinna razhladacca taksama ŭ adnym pracesie. Pieršy tydzień aryštu Čulcova i Andrejeva navat znachodzilisia ŭ adnoj kamery, ale potym ich raździalili. Žurnalistki tolki adnojčy bačylisia ŭ kalidory SIZA ŭ Žodzina.
«Kaciaryna z kožnym dniom usio ciažej pieranosić źniavoleńnie, heta adčuvajecca, — kaža Ihar Iljaš. — Ale jana zachoŭvaje badziory nastroj, bajavy. U pryncypie, jana ad samaha pačatku rychtavałasia, što moža być aryšt, takoje raźvićcio padziej. Kryminalnaja sprava za prafesijnuju dziejnaść. Jana rychtavałasia psychalahična. Tamu ŭ hetym planie jana trymajecca. Kaniečnie, byvajuć notki depresiŭnyja ŭ listach. Ale heta naturalna. Ja pa sabie viedaju, što navat kali 15 sutak siadziš, to byvajuć pierapady nastroju. U cełym Kacia trymajecca dobra. Što da stanu zdaroŭja, to paśla pieravodu ŭ Žodzina ŭ Kaci byli dva mocnyja alerhičnych prypadki. Ale potym užo ŭsio ŭ paradku, jana bolš nia skardziłasia».
Žurnalistka Tut.by Kaciaryna Barysievič za kratami ŭžo 52 dni. Pieršyja niekalki sutak jana praviała ŭ «amerykancy», zatym jaje pieraviali ŭ SIZA na vulicy Vaładarskaha. Pra chod raśśledavańnia spravy «ab razhałošvańni ŭračebnaj tajamnicy, jakoje mieła ciažkija nastupstvy» amal ničoha nieviadoma. Razam z Barysievič pa joj prachodzić lekar Arciom Sarokin, jaki taksama znachodzicca pad vartaj. Viadoma, što da Barysievič u SIZA dachodziać daloka nia ŭsie listy. Sama žurnalistka piša, što čakaje sudu, na ŭmovy ŭtrymańnia nia skardzicca. Da jaje dachodziać pieradačy, nastroj badziory.
