68-hadovamu piensijanieru MUS, aktyvistu AHP Uładzimiru Niapomniaščych z Homiela vystavili jašče adno abvinavačańnie, piša «Radyjo Svaboda».
U dadatak da pieršaha abvinavačańnia — «pahroza hvałtu» ŭ dačynieńni da prakurora, piensijaniera abvinavacili i ŭ abrazie hetaj słužbovaj asoby.
Ciapier Uładzimir Niapomniaščych (jon za kratami ad 23 śniežnia) maje dźvie kryminalnyja spravy — pa artykule 366 Kryminalnaha kodeksa (Hvałt ci pahroza hvałtu słužbovaj asobie) i pa artykule 369 KK (Abraza pradstaŭnika ŭłady).
Advakat Siarhiej Krasnoŭ udakładniŭ, što i ŭ «novym» abvinavačańni pakul niama kankretyki — jak mienavita Uładzimir Niapomniaščych abraziŭ prakurorku Alesiu Žuraŭlovu i jakim čynam jon joj pahražaŭ.
«Uładzimir Michajłavič trymajecca badziora, dziakavaŭ usim za listy i padtrymku. Z nahody novaha abvinavačańnia jon tolki ŭśmichnuŭsia — bo nie pamiataje, kab abražaŭ ci pahražaŭ prakurorcy», — zaznačyŭ advakat.
11 studzienia jahonaja žonka i susiedka atrymali listy ad Niapomniaščych. Jon piša ŭ liście susiedcy: «Pieramoha budzie za śviatłom i praŭdaj. Ciemra, jakaja aharnuła Biełaruś, chłuśnia, podłaść i miarzota syduć — ja ŭ hetym upeŭnieny!»
