Kiraŭnik «Havary praŭdu» i kandydat u prezidenty 2020 hoda Andrej Dźmitryjeŭ zaniaŭsia stvareńniem «Našaj partyi».
Andrej Dźmitryjeŭ. Fota Nadziei Bužan
«Heta praca, jakaja viadziecca faktyčna štodnia. My ŭžo vyrašyli ad imia arhkamiteta partyi vyłučacca na «Schod narodnych pradstaŭnikoŭ». Kazać pra terminy pakul, moža, i nie varta.
Skažu, što śpis na tysiaču čałaviek užo sabrali. Adnak niezrazumieła, jak pravieści ŭstanoŭčy schod na tysiaču čałaviek, jak taho patrabuje Ministerstva justycyi, ci budzie heta biaśpiečna dla ludziej.
Tamu ciapier my ŭ čakańni, zajmajemsia raspracoŭkaj prahramy. Faktyčna štotydniova jość zum-kanfierencyi, kudy moža dałučycca luby achvotny abmierkavać važnyja pytańni z ekśpiertami. Dla nas pryncypova, kab hetaja partyja była pabudavanaja nie adniekul źvierchu, a samimi ludźmi», — kaža Andrej Dźmitryjeŭ.
Ci «Naša partyja» — heta kančatkovaja nazva albo pracoŭnaja? «Ja dumaju, što kančatkovaja, ale jaje jašče pavinien pryniać źjezd. Było 5-7 roznych nazvaŭ, ale hetaja stała topavaj, bo adlustroŭvaje toje, što ludzi chočuć bačyć».
Ułady abiacajuć źmieny ŭ partyjnym žyćci krainy. Nie vyklučana, što ŭžo nastupnyja parłamienckija vybary častkova mohuć prajści pa partyjnych śpisach. Heta paŭpłyvała na rašeńnie Dźmitryjeva ruchacca ŭ bok stvareńnia palityčnaj partyi?
«Ja ŭ heta ŭsio nie vieru, ja stary čałaviek, daŭno žyvu i šmat čuju pra kanstytucyjnyja źmieny.
U 2016 hodzie ŭ «Havary praŭdu» my pravodzili vialiki forum, dzie było pryniataje rašeńnie, što pačniom vybudoŭvać palityčnuju partyju, ale nie chočam, kab «HP» pieratvarałasia ŭ partyju. Hetaja praca prachodzić paralelna z «Havary praŭdu».
2020 staŭ niadrennym pačatkam dla takoj dziejnaści, bo šmat ludziej palityzavałasia. Šmat chto pačaŭ dumać, jak rabić dobryja rečy dla krainy, što možna dziejničać i nie tolki praz vulicu. Ciapier čas dla stvareńnia partyi nie tamu, što ŭłada niešta abiacaje, a tamu, što ludzi hatovyja abjadnoŭvacca, dziejničać, havaryć pra palityku.
Palityčnaja partyja — heta cyvilizavany ŭdzieł u palitycy. My pavinny rychtavać hramadstva. Nichto, navat Łukašenka, nie moža sprahnazavać, jak buduć raźvivacca padziei ŭ krainie — usio moža zaciahnucca nadoŭha, a moža vyrašycca za adzin dzień. I kali hetyja źmieny buduć raptoŭnyja, a hramadstva nie budzie hatovaje, to pieramohuć tyja, pra kaho my nie viedajem i nie čujem. Jany zabiaruć hetuju pieramohu ŭ hramadstva», — kaža Dźmitryjeŭ.
Pakul palityk nie nazyvaje imiony ludziej, jakija prymajuć udzieł u stvareńni «Našaj partyi». «U arhkamitecie kala 300 čałaviek. Heta zbolšaha novyja ludzi. Viadoma, jość tyja, chto z «Havary praŭdu» pryjšoŭ, ale vialikaja častka novych ludziej. My chočam, kab partyja žyła na ŭnioski. Nam patrebna kala 1500 čałaviek, jakija płociać pa 10-12 rubloŭ na miesiac, kab partyja mahła ŭtrymlivać ofis i niekalki čałaviek. Budziem imknucca da hetaha».
Na jakich ideałahičnych padmurkach budzie stajać «Naša partyja», čaho dabivacca? «Jašče pahladzim, jakaja prahrama budzie, za asnovu ŭziataja maja prezidenckaja prahrama. Ja nie lublu ideałahičnych padziełaŭ, bo jany štučnyja.
My ŭsie razumiejem, što biełaruskaj ekanomicy patrebnyja rynkavyja reformy, ale praź biednaść nasielnictva patrebnaja sacyjalnaja padtrymka. Biełarusi treba raźvivać rehijony. My budziem vystupać za samakiravańnie, a druhaja važnaja tema — viartańnie zakonnaści ŭ krainie», — padsumoŭvaje Dźmitryjeŭ.
Ad vosieni ŭžo niekalki inicyjatyvaŭ zajavili pra stvareńnie palityčnych partyj. U pryvatnaści pra heta kazali niekalki prarasijskich ruchaŭ, u tym liku Siarhiej Łušč. Učora arhkamitet «Demakratyčnaha sajuza» prezientavaŭ Andrej Łankin, były paplečnik Valeryja Capkały.
