Fota Biełsat
Spravu razhledzieła sudździa Kaciaryna Muraška. Dziaržabvinavačańnie pradstaŭlaŭ prakuror Zubik. Abaraniaŭ dziaŭčynu advakat Stanisłaŭ Abraziej, paviedamlaje spring96.org.
Renata Śmirnova była zatrymanaja razam z chłopcam 1 listapada na Maršy suprać teroru ŭ Minsku. Na jaje zaviali kryminalnuju spravu i adpuścili. Była zatrymanaja pry pierasiačeńni miažy. Joj źmianili mieru strymańnia i źmiaścili pad vartu da suda. Da zatrymańnia dziaŭčyna pracavała barystaj, źbirałasia pastupać u BDU.
Stajała ŭ pieršym šerahu sčepki
Dziaŭčynu abvinavacili ŭ tym, što 1 listapada jana była na praśpiekcie Niezaležnaści ŭ hrupie asob, jakija hruba parušajuć hramadski paradak. Mienavita — stajała ŭ pieršym šerahu sčepki i błakiravała darohu. Škoda Minsktransu — 10 689,76 rubla.
U aŭtazak pryjšła sama — za chłopcam
Śviedka — Ivan Zubko (małady čałaviek dziaŭčyny), jakomu taksama pradjaŭlenaje abvinavačańnie pa art. 342. Jon taksama znachodzicca pad vartaj.
Ivan raspavioŭ, što jany pryjechali da zavoda «Łuč», dzie ŭ telehram-kanałach byŭ paznačany punkt zboru. Praź dziesiać chvilin jany rušyli ŭ bok pierasiačeńnia z Vałhahradskaj, u rajonie dziciačaj čyhunki stajaŭ taniravany transpart i supracoŭniki AMAPa. Padčas pasiadžeńnia prysutnyja prahladzieli zapis z nahrudnaj kamiery supracoŭnika AMAPa: na joj bačna, što Śmirnova staić nie ŭ pieršym šerahu, biez płakataŭ i simvoliki. Kali supracoŭniki AMAPa nakiravali ŭ bok pratestoŭcaŭ zbroju i zapatrabavali syści z prajeznaj častki, Śmirnova «adrazu ž padparadkavałasia». Adnak kala doma 101 pa praśpiekcie Niezaležnaści pačalisia zatrymańni, ludzi stali ŭ sčepku. Ivana źbivali, dušyli i paviali ŭ aŭtazak — dziaŭčyna pajšła za im i taksama paprasiłasia ŭ aŭtazak. Spačatku jaje sprabavali nakiravać dadomu, ale potym zabrali: u aŭtazaku schapili za vałasy i pastavili na kaleni.
Kali prakuror dapytvaŭ Zubko, jon zapytaŭsia, čamu dziaŭčyna pajšła ŭ aŭtazak.
Ivan Zubko adkazaŭ: «Vysakarodnaść, kachańnie…»
Zubkoŭ viedaŭ, što mierapryjemstva niesankcyjanavanaje, na pytańnie, čamu pry błakiroŭcy nie dumali pra inšych ludziej u transparcie, adkazaŭ, što ŭsie ich padtrymlivali.
Palitźniavolenaja Renata Śmirnova paćvierdziła śviedčańni Ivana Zubko. Udakładniła, što zhodnaja z tym, što parušyła zakon, ale hetaje pravaparušeńnie nijak nie «ciahnie» na kryminalny artykuł.
Pry vobšuku byli vyniatyja adzieńnie, u katorym dziaŭčyna była na mitynhu, dva noŭtbuki, videakamiera, dva mabilnyja telefony, płanšet, fotaaparat, elektronnaja kniha, ćviordy dysk, fłeški.
Śviedki nie paznali Śmirnovu
Śviedkami abvinavačańnia vystupili Alaksiejeŭ, Kuparčuk, Śvirydaŭ, Šeŭčyk i Nazaraŭ (usie zasakrečanyja). Čaćviora ź ich kazali adnolkavyja rečy, piaty — Šeŭčyk — nie źjaviŭsia na pasiadžeńnie. Nichto ź ich nie paznaŭ Renatu Śmirnovu. Śvirydaŭ skazaŭ, što dziaŭčyna vykrykvała «antydziaržaŭnyja łozunhi», ale nie zhadaŭ, jakija.
Jašče adna śviedka — pradstaŭnica Minsktransa — juryskonsult Nastaśsia Kuźniacova skazała, što nie pamiataje abstavin pazovu: jaho padavała prakuratura. Dakumientaŭ u jaje z saboj nie było.
Prakuror zaprasiła dla palitźniavolenaj Renaty Śmirnovaj dva hady abmiežavańnia voli biez nakiravańnia ŭ papraŭčuju ŭstanovu — «chatniaj chimii», a taksama vyzvalić jaje z-pad varty pad zakład.
Advakat prapanavaŭ zakryć spravu, tamu što za adno pravaparušeńnie dvojčy nie pryciahvajuć da adkaznaści, a pra spravie za pieršaha listapada Renatu ŭžo asudzili pa administracyjnym artykule.
Sudździa Kaciaryna Muraška prysudziła dziaŭčynie dva hady abmiežavańnia voli biez nakiravańnia ŭ papraŭčuju ŭstanovu — «chatniaj chimii».
